Родителите кои често ги користат своите мобилни телефони или таблети во присуство на своите деца, според новите податоци, би можеле негативно да влијаат врз развојот на мозокот кај децата и да го зголемат ризикот од проблеми со менталното здравје.
Австралиските истражувачи анализирале податоци од повеќе од 15.000 деца под петгодишна возраст и откриле дека децата чии родители често користеле технологија пред нив имале полоши резултати во задачите поврзани со планирање, организација и концентрација.
Кај овие деца исто забележани се и поголеми проблеми со споделувањето работи и регулирањето на емоциите. Покрај тоа, се покажало дека тие имаат послаба способност за одржување на вниманието, планирање и организирање на секојдневните активности.
Не само децата – и однесувањето на родителите има своја цена
И додека на родителите со години им се советува да го ограничат времето што нивните деца го поминуваат пред екраните, новото истражување сугерира дека родителската употреба на технологијата би можела да има слични негативни ефекти.
Научниците од Универзитетот Волонгонг во Нов Јужен Велс, кои ги објавија своите наоди во списанието JAMA Pediatrics, наведуваат дека користењето на екрани од страна на родителите води до „помалку можности децата да учествуваат во активности што го промовираат развојот на когнитивните вештини“.
Авторите додаваат дека чувството на занемареност кај децата предизвикува фрустрација, негативни емоции и поттикнува себично однесување. Студиите покажале дека до 70% од родителите користат технологија за време на игра или оброци со своите деца – честопати повеќе пати на ден.
Поврзаност со депресија, анксиозност и агресија
Научниците анализирале податоци од 21 студија и откриле дека децата чии родители често користеле екрани во нивно присуство имале поголем ризик од развој на негативни емоции како што се тага, страв и грижа – типични знаци на депресија и анксиозност.
Покрај тоа, овие деца имале поголема веројатност да имаат напади на бес, импулсивност и кршење правила. Авторите нагласуваат дека недоследните родителски одговори честопати предизвикуваат фрустрација бидејќи родителите се најважните учители во раниот развој.
Првата сеопфатна анализа – но не и последен збор
Научниците забележуваат дека ова е прва сеопфатна анализа од ваков вид и дека сè уште постојат отворени прашања за тоа како точно употребата на технологијата од страна на родителите влијае врз развојот на детето. Во иднина, треба да се испита кое време од денот и кои активности се најштетни и како да се ограничат.
Што можат да направат родителите?
„Регулирањето и контролата на употребата на уреди во присуство на деца може да помогне во ублажување на потенцијалните негативни последици“, заклучуваат авторите.
Светската здравствена организација препорачува децата под две години воопшто да не поминуваат време пред екран, додека децата на возраст меѓу две и четири години не треба да поминуваат повеќе од еден час пред екран дневно.
Прекумерното изложување на екрани во раното детство е поврзано со низа здравствени и проблеми во однесувањето – од проблеми со видот до тешкотии во регулирањето на емоциите.
