Американските начници од Јеил ливер центарот, откриле дека пациентите со КОВИД-19 имаат абнормални тестови на црниот дроб со многу повисока стапка отколку што сугерирале претходни испитувања. Тие откриле дека е зголемено нивото и на ензимите на црниот дроб – протеини кои се ослободуваат кога црниот дроб е оштетен – кое е поврзано со лоши исходи за овие болни, вклучувајќи хоспитализација на интензивна нега, механичка вентилација и смрт.
Инаку, претходни студии спроведени во Кина покажале дека околу 15 проценти од болните со КОВИД-19 имаат абнормални тестови на црниот дроб.
Ова истражување покажало дека зачестеноста на абнормалните тестови на црниот дроб е многу поголема – помеѓу 41,6% и 83,4%, зависно од специфичниот тест.
Истражувачите ги следеле резултатите од стандардните тестови на црниот дроб – аланин аминотрансфераза (АЛТ) и аспартат аминотрансфераза (АСТ) чии зголемувања укажуваат на воспаление во клетките на црниот дроб, билирубини чие зголемување укажува на дисфункција на црниот дроб, како и на алкалната фосфатаза (АЛП) чие зголемено ниво може да укажува на воспаление на жолчните канали.
Иако не е јасно зошто зачестеноста на абнормалните тестови на црниот дроб е толку поголема отколку во претходните студии во Кина, се претпоставува дека постојат други здравствени разлики помеѓу Кинезите и Американците, кои би можеле тоа да го објаснат, како поголемата честота на замастен црн дроб кај луѓето во САД.
Во тек се и дополнителни клинички и лабораториски студии кои дополнително би го објасниле влијанието на КОВИД-19 на патологијата на црниот дроб.
