“Значајно е пониска стапката на смртност од КОВИД-19 меѓу оние кои се вакцинирани со две дози во споредба со оние кои се вакцинирани со една доза или воопшто не се вакцинирани“, објави британскиот Национален завод за статистика (ONS).
Во истражувањето и анализата на националниот завод биле користени стапките на смртност прилагодени на возраста, кои ги земаат предвид разликите во годините на старост и бројноста на припадниците на возрасните групи, за да се добие валидна споредба на различни групи вакцинирани и невакцинирани.
Резултатите покажале дека во периодот од 2. јануари до 21. септември оваа година, стапката на смртност меѓу невакцинираните изнесувала 849,7 на 100.000 жители. Меѓу вакцинираните со две дози стапката била само 26,2 на 100.000 лица, а за вакцинираните со една доза стапката изнесувала 105,3.
“Овие се засега најдобрите достапни податоци за ефикасноста на вакцините и спречувањето на најтешки исходи од КОВИД-19“, вели д-р Питер Инглиш, поранешен советник во националното тело за контрола на заразни болести.
Тој додава и дека вакцините не се стопроцентно ефикасни, па некои и ќе се заразат или ќе умрат, иако се вакцинирани.
“Но, важната порака што произлегува од ова истражување е дека вакцината е многу ефикасна против смртоносниот исход од КОВИД-19. Веројатноста дека ќе умрете од последици од КОВИД-19 Е 32 пати помала ако сте вакцинирани, а и една доза ви дава одредено ниво на заштита, иако не како две“, истакнува д-р Инглиш.
