Изненадно целосно или речиси целосно избегнување на крута храна кај малите деца може да биде еден од показателите за развој на КОВИД-19 и е последица на промените во сетилото за мирис и вкус кај децата, се наведува во научниот труд на калифорниските лекари. Во трудот објавен пред неколку дена во списанието Pediatrics, се опишани две мали деца, двете помлади од 18 месеци, кои ненадејно развиле аверзија кон цврста храна приближно во време кога им е дијагностициран КОВИД-19. Кога нешто и би изеле, веднаш после тоа би се задушиле или би ја исплукале храната.
ЧУВСТВИТЕЛНОСТ НА МИРИС
Едно дете, во исто време кога се развила и одбојноста кон храна, ненадејно станало чувствително и на мирис од било кој ароматичен производ што е уште еден знак за ослабен мирис. Шест до осум месеци по дијагнозата, двете деца почнале да поднесуваат цврста храна, но ниту едно комплетно не продолжило со внес на првичните количини на крута храна.
НЕКОГАШ И ТРАЈНИ СИМПТОМИ
“Овој одложен и променлив клинички тек кај нашите мали пациенти е во склад со неодамнешните студии на возрасни лица кои покажуваат дека проблемите со мирисот и вкусот се поврзани со КОВИД-19, може да се развијат и да исчезнат, а една третина од пациентите може да имаат трајни симптоми“, велат лекарите.
Врз основа на овие ограничени податоци, тие заклучиле дека аверзијата кон храна кај малите деца кои се уште не зборуваат “треба да биде знак дека треба да се тестираат за евентуална присутност на вирусот SARS-CoV-2“.
