Во време на пандемија на коронавирус, многумина си го поставуваат прашањето: Дали антибактериските сапуни се поефикасни од обичните сапуни?
♦♦♦♦♦♦♦
Најпрво, важно е да се разбере како вирусот се шири. „Коронавирусот се шири преку капки“, вели д-р Карл Фихтенбаум, специјалист за заразни болести на Медицинскиот факултет на Универзитетот во Синсинати. Тој објаснува за „Хафингтон пост“ дека станува збор за микроскопски честички што содржат вирус, протеини, јаглехидрати и други материјали. Тие патуваат во воздухот на кратки растојанија, помали од еден метар, односно се транспортираат преку капки, објаснува овој експерт. Ако некој кашла или кива, честичките што содржат вирус патуваат низ воздухот. Помалите честички, исто така, може и да се вдишат, па експертите веруваат дека ова би можело да биде втор пат за пренос на вирусот „Ковид-19“.
Секрециите од носот или устата можат да предизвикаат ширење на вирусот. На пример, споделување на чаша е многу опасно, исто како и ракувањето, па затоа не изненадува што постојано се зборува за важноста на честото и темелно миење на рацете, како и нивна дезинфекција. Најдобар начин за одржување хигиена на рацете е „старомодниот“: миење на рацете со вода и обичен сапун најмалку 20 секунди. Притоа, истакнуваат експертите, не е битен типот на сапун, бидејќи нема докази дека антибактериските сапуни се поефикасни од обичните сапуни.
Се разбира, можеби нема да имате пристап до вода и сапун во секое време, но сè што содржи 60% алкохол или повеќе во средствата за дезинфекција ќе биде ефикасно во борбата против вирусот. Како и да е, сапунот и водата најмногу се препорачуваат затоа што оваа „комбинација“ подобро ги уништува микробите отколку средствата за дезинфекција.
