Секој човек независно од возраста се буди по 5-6 пати во текот на ноќта, кога преминува низ различните фази на сонот. Некои деца брзо учат сами и природно го продолжуваат сонот, но други поемоционални имаат потреба од ваша интеревнција. Многу родители, кои имаат деца до 3-4 години треба да стануваат на секое будење на детето среде ноќ, кога го смируваат со зборови, му даваат вода, млеко, го гушкаат и лулаат…
Освен преминувањето низ фазите на сонот, постојат и многу други причини зошто децата се будат навечер.
Кога се зборува за бебе до 6 месеци, проблемот со неспокојниот сон се должи најчесто на глад, стомачни грчеви, дискомфорт поради полна пелена. Во првите месеци од животот, децата не разликуваат ден и ноќ, поради што не е невообичаено да се разбудат и три пати во ноќта, со широко отворени очи, полни со енергија и подготвени за игра. Ако детето е навикнато на цуцла, не е чудно да се разбуди и да плаче за неа, оти ја испуштило од уста.
Помеѓу 6-12 месеци пак се појавуваат други вознемирувачки стимули – појавата на првите бебешки заби. Болката не само што може да го разбуди бебето туку и да предизвика незапирливо и пролонгирано плачење во ноќта.
Неспокојниот ноќен сон на оваа возраст, исто така, се должи на прекумерната возбуда – бебето играло до доцна, било на нечиј роденден, се среќавало со многу луѓе итн. Има бебиња кои се будат едноставно затоа што се навикнале да пијат вода, млеко или да бидат доени во текот на ноќта. За нив, шишето или градите се совршени за усспивање и тие не гледаат причина да се откажат од тоа.
Децата на возраст меѓу 1 и 3 години се многу повеќе свесни, а причините за нивното будење во текот на ноќта се менуваат. Тоа е возраста во која децата почнуваат да се плашат од темница, стравуваат мама и тати да не ги остават и се будат, за да се уверат во спротивното. Ако родителите се отсутни неколку дена или една недела и други го чувале детето, тоа може сериозно да го влоши сонот.
На оваа возраст децата се многу емоционални и чувствителни и живо ги преживуваат сите настани во текот на денот и како целина во нивниот живот, што се одразува и на сонот. Ова може да е причината детето да блада, плаче, да прета низ кревет, да зборува во спиење, а кога одите кај него, тоа да е со затворени очи или да ве гледа, без да ве види во полузаспана состојба.
Карактеристични за оваа возраст се и детските кошмари, како и никнувањето на забите катници, што може дополнително да го влоши ноќниот сон. Иако поретко, причина за ноќно будење може да биде и доцната вечера и тешката храна. Доцното легнување и користењето таблети и телефони пред спиење исто така неизбежно доведуваат до будење среде ноќ.
