Децата забележуваат и помнат многу работи кои нам, возрасните, не ни паѓаат на ум. Можеби треба почесто да го имаме тоа на ум, особено кога размислуваме за тоа по што и како би сакале децата да нè паметат.
Што ги тера да се чувствуваат сакани
Многумина барем еднаш се запрашале што е тоа што децата го паметат, по што се сеќаваат на своите мајки. Една американска наставничка токму ова прашање им го поставува на своите ученици секоја година за Денот на мајката – веќе 16 години. Тогаш од учениците бара да ѝ дадат совети поврзани со мајчинството, иако ниту едно од нив сè уште нема свое дете.
„Ги замолувам да размислат за работите што нивните мајки ги направиле за нив, а поради кои се чувствувале среќни или сакани. Во училницата настанува тишина – децата пишуваат интензивно и подолго од кога било. Често и се насмевнуваат додека се присетуваат на тие убави моменти“, раскажува таа.
По години читање на нивните одговори, наставничката дошла до интересно откритие:
„Од година во година, во секое училиште и држава каде што сум предавала, учениците повторно и повторно ја испраќаа истата порака. Најмногу ги паметат малите нешта што нивните мајки ги направиле за нив.“
Многу мајки денес, под притисокот на општеството, околината, социјалните мрежи и бројните обврски, често чувствуваат дека не се доволно добри. Се трудат да им овозможат сè на своите деца – различни искуства, активности и друго. И да, разбирливо е дека родителите сакаат најдобро за своите деца, но можеби понекогаш треба да се потсетиме што навистина е важно.
„По безброј разговори на оваа тема со моите ученици, ми стана јасно што најмногу ги радува децата – најсреќни биле кога нивните мајки направиле нешто, навидум мало, за нив или со нив.“
Таа направила и список со топ 10 работи кои учениците најчесто ги наведувале како најдрага успомена на својата мајка:
-
Навечер доаѓаше во мојата соба, ме покриваше и ми пееше песна. Исто така, ми раскажуваше приказни за кога сум бил мал.
-
Ме гушкаше, ме бакнуваше, седеше со мене и често ми зборуваше.
-
Поминувавме квалитетно време заедно – само јас и таа, не само со брат ми или сестра ми.
-
Внимаваше на тоа што јадам за да пораснам здрав.
-
За време на вечера разговаравме што можеме да правиме заедно за викенд.
-
Навечер зборувавме за сè – љубов, училиште, семејство итн.
-
Ми дозволуваше долго да се играм надвор.
-
Си лежевме под ќебе и ја гледавме нашата омилена ТВ емисија.
-
Ме дисциплинираше. Тоа ми покажуваше дека навистина ѝ е грижа за мене.
-
Ми оставаше посебни пораки на маса или во кутијата за ужина.
