Животот денес е многу различен од начинот на кој се живеело пред 20, 30 и повеќе години, а тоа се одразува на се. Детството на денешните деца е значително различно од она што го имале нивните мајки и татковци, а да не зборуваме за нивните баби и дедовци. Ова, се разбира, има свои предности, но и недостатоци.
Педијатарот д-р Фјодор Катасонов зборува за тоа како оваа голема промена влијаела на здравјето на децата, и дека сега детските болести се променети.
Претеруваме со хигиената
Детските болести се променија во голем дел благодарение на вакцините и перинаталната медицина, кои драстично ја намалија стапката на смртност кај децата. Меѓутоа, сега, децата ги мачат некои други здравствени проблеми, кои главно се поврзани со начинот на живот – бронхијална астма, алергии и обезноста.
Д-р Катасонов посочува дека се претерува кога станува збор за хигиената, иако родителите тоа го прават со најдобра намера – за да им биде се чисто на најмалите и евентуално да се избегнат некои инфекции. Меѓутоа, педијатарот напоменува дека во Скандинавија, каде сите се „опседнати“ со чистотата, многу повеќе деца имаат алергии отколку во Италија, на пример, каде што е вообичаено да им се дозволува на децата да ползат по подот во кафулето.
Тој наведува и дека децата денес претежно живеат во градови и дека веќе немаат постојан контакт со алергени, што било претходно случај. Сето тоа, смета тој, влијае на имунитетот и го зголемува ризикот од развој на алергии.
Сепак, докторот напоменува дека секако не може да се издвои една причина зошто има се повеќе деца со алергии и дека е потребно детално истражување на оваа тема за да се дојде до конкретни заклучоци.
Уредите ја менуваат комуникацијата во живо
Денес е вообичаено и многу мали деца да „користат“телефони, но Светската здравствена организација и експертите постојано предупредуваат на негативните последици од „дигиталните бејбиситерки“. Главните проблеми поврзани со прекумерната употреба на телефони кај децата се помала физичка активност, но и проблеми со зборувањето бидејќи овие уреди ја менуваат комуникацијата со родителите во период кој е клучен за развојот на говорот.
Превенција
Најдобрата превенција против многу современи проблеми е вакцинацијата, здрав сон и што помалку стрес, вели педијатарот.
Покрај различните вакцини кои спречуваат некои сериозни болести кај децата, здрав сон, здрава исхрана и физичка активност, за здравјето многу се важни. Исто така, важно е да се намали стресот на можен минимум, кога веќе не може целосно да се елиминира. Неговиот совет до родителите е да не ги преоптоваруваат децата, да не ги носат постојано на часови и тренинзи.
