Емоционалното занемарување од страна на таткото може да има трајни последици во текот на животот на детето, дури и кога ќе порасне. Како што објаснуваат психолозите, постојат неколку знаци кои јасно покажуваат дека личноста пораснала со татко кој емотивно ја занемарувал. Тие исто така нагласуваат дека во повеќето случаи овие знаци можеме да ги забележиме дури во зрелоста.
Со оглед на тоа дека мажите со генерации биле обесхрабрувани да покажуваат емоции, многу татковци се чувствуваат многу непријатно поради сопствените чувства и чувствата на другите. Исто така, бидејќи научиле да се обидуваат да ги кријат своите емоции наместо да ги искажуваат и да се справуваат со нив, многу татковци немаат добри емоционални вештини, што има многу негативно влијание врз нивните деца.
Имено, многу истражувања покажуваат дека луѓето кои пораснале со татковци кои емотивно ги занемарувале, потешко одржуваат партнерски односи, имаат недостаток на самодоверба и генерално се повеќе склони кон депресија или анксиозност.
Знаците дека најверојатно сме пораснале со таков татко го вклучуваат следново:
- Се чувствуваме непријатно кога сме сами со нашиот татко
- Нашиот однос со таткот ни изгледа недоволно близок, односно ладен
- Ни се чини дека нашиот татко не нè познава доволно добро
- Тешко можеме да разговараме со таткото
- Имаме проблеми во комуникацијата со нашиот татко или често се расправаме со него без причина.
