Нежното родителство е сè попопуларен метод на родителство кој ги поттикнува мајките и татковците да ги препознаат чувствата на нивните деца, а истовремено спроведуваат правила.
„Нежното родителство има поголем фокус на почитување на децата и нивната индивидуалност, како и на покажување емпатија и поврзаност“, вели детскиот психолог Ирина Горелик.
Тоа не значи дека родителите кои го следат овој пристап не спроведуваат никаква дисциплина. Нежното родителство има за цел ист исход како и традиционалното родителство, но користи поинаков пристап. Наместо казнување, родителот може да го дисциплинира детето со разбирање.
Предностите на нежното родителство се многукратни. Нежното родителство може да ја зголеми самодовербата и способноста на детето да ги регулира сопствените емоции. Може да ја намали борбата за моќ меѓу детето и родителот, а со тоа да ги подобри односите. Исто така, може да ја подобри комуникацијата помеѓу детето и родителот.
„Кога размислувате за спроведување правила, може да биде корисно да се идентификуваат и да се потврдат основните емоции и истовремено да се постават јасни граници“, вели Горелик, наведувајќи три примери за тоа како нежното родителство може да изгледа во пракса.
Вашето дете сака играчка додека сте на пазарување
Горелик советува пред да одите во продавница, да му објасните на детето дека одите на пазарување и дека би можеле да видите работи кои ќе сакате да ги купите, а не ви се потребни бидејќи ви требаат само намирници.
Ако вашето дете во продавница сепак почне да бара од вас да му купите играчка, кажете му: „Гледам дека навистина ја сакаш оваа играчка, изгледа многу забавно и јасно ми е зошто ја сакаш. Денес не купуваме нови играчки. Знам дека е фрустрирачки, нотака се договоривме“.
Вашето дете не сака да го пушти мобилниот телефон од раце и да се подготви да излезе од дома
Пред да тргнете, можете да му кажете на вашето дете: “Знам дека навистина сакаш да останеш дома и да играш видео игри. Неправедно е што мораме да одиме. Понекогаш и јас сакам да останам дома, но мораме да одиме”.
Ако детето одбива да го исклучи мобилниот телефон или таблетот и да се облече, можете да поставите построга граница и да кажете: „Времето за мобилен телефон истече. Знам дека е тешко да се прекине забавата. Можете да го исклучиш сам или јас ќе го исклучам“.
Ако детето продолжи да одбива, родителот може сам да го исклучи мобилниот телефон.
Детето се кара со братот или сестрата
Горелик предлага во ваква ситуација да ги предупредите децата дека не треба да се караат, а особено да се тепаат, околу, на пример, играчка.
„Можете физички да ги разделите и да им помогнете да се оладат. Подоцна, можете да разговарате што друго може да направи детето следниот пат кога ќе се фрустрира поради братот, сестрата или свој врсник“, вели таа.
Сите овие пристапи имаат за цел да му помогнат на вашето дете да се чувствува разбрано, истовремено учејќи го како да се справи со своите емоции.
