Како прво и основно, рускиот лекар Евгениј Комаровски како заштита од вирусни инфекции наведува престој на отворено и избегнување на гужви.
“Концентрацијата на вируси под ведро небо е илјадници пати помала отколку во било кој затворен простор, било да е тоа стан, училница, автобус“, вели тој.
Затоа, потенцира д-р Комаровски треба два пати да размислите пред да ги однесете децата било каде, а тоа да не е на отворено. Тажна е сликата на армија деца на елеваторите во трговски центри кои трчаат накај игротеките “оти надвор е студено“. Тажно е кога децата многу често ќе ги слушнете како велат “денес не бевме надвор“. А, зошто? Бидејќи било студено времето.
СОВЕТИ
Доколку некој во непосредна близина, кива, кашла или шмрка – држете растојание.
Миењето раце и проветрувањето на просториите не треба посебно да се нагласува. Се знае дека честичките на вирусите со часови и денови опстојуваат во задушлив, топол и застоен воздух, а практично истиот момент умираат на чист, студен, влажен и свеж воздух.
Д-р Комаровски наведува оптимални вредности на воздухот за простории во кои се престојува: температура од 16 до 22 степени и релативна влажност на воздухот од 40 до 70%.
“Држете се до овие граници. Ако ви е студено, облечете се. Не се претоплувајте. Одржувајте влажност во просторијата и проветрувајте“, вели тој.
Тој советува децата задолжително да носат ракавици, оти освен што штитат од ладно, штитат и при фаќање на рачките на вратите и во градскиот превоз.
