Дали храната може да влијае на расположението на вашето дете? Ако им се верува на педијатрите, може. Имено, истражувањата покажале дека тоа што го јаде вашето дете може позитивно да влијае на неговото расположение, но и на целокупното ментално здравје, пренесува Motherly.
Денешните експерти се повеќе се интересираат за влијанието на храната врз расположението и менталното здравје на децата. Без разлика дали се работи за давање на парче темно чоколадо или воведување риба во дохраната, храната што му ја давате на детето не само што му помага за неговото учење и меморија, туку може и да го зголеми и чувството за среќа. Ве интересира како? За се се заслужни хранливите состојки кои се наоѓаат во храната, а еве кои намирници според експертите можат да го подобрат расположението на вашето малечко.
1. Шарено овошје и зеленчук
Добро е познато дека шареното овошје и зеленчук е полно со фитонутриенти кои се борат против клетките кои предизвикуваат стареење на мозокот, но и на другите ткива во телото. Флавоноидите, кои овошјето и зеленчукот ги имаат во изобилство, се поврзани со намален ризик од депресија и на тој начин влијаат на доброто расположение. Во една студија во која учествувале деца на возраст меѓу седум и 10 години, се покажало дека пиењето напивка од боровинки богато со флавоноиди ефикасно го подобрува расположението.
И многу други спроведени студии ја покажале поврзаноста помеѓу овошјето и зеленчукот со доброто расположение. Накратко, колку повеќе овошје и зеленчук има на менито на вашето дете, толку тоа ќе биде позадоволно.
2. Лиснат зеленчук
Лиснат зеленчук, особено темно лиснат зеленчук, е богат со железо и други хранливи материи како што се фолати, влакна, магнезиум и витамини А и Ц. Овие хранливи материи ја поддржуваат функцијата на мозокот, но исто така е докажано дека го подобруваат расположението. Редовно понудете му на вашето бебе лиснат зеленчук како цвекло, кељ, спанаќ, блитва и зелена салата и слободно додадете ги во супи или чорби.
3. Бобинки
Бобинки како што се боровинки, малини или капини содржат голем број на антиоксиданти, антоцијани и полифеноли. Тие се борат со стресот и го подигнуваат расположението. Тие исто така ја подобруваат меморијата, учењето и фокусот.
4. Овес
Овесот е одлична храна за подобрување на расположението поради високата содржина на триптофан и други хранливи материи како што се витамините Б, влакна и железо. Овесна каша, овесни снегулки или здрави бисквити од овес, се одличен оброк за вашето дете, а освен што се богати со здрави хранливи материи, ќе го подобрат и неговото расположение.
5. Јаткасти плодови и семиња
Јаткастите плодови и семките содржат влакна, магнезиум и омега-3 масни киселини. Особено, се покажало дека оревите го намалуваат стресот и напнатоста поради нивното високо ниво на антиоксиданти, вклучувајќи омега-3 масти, фолна киселина и витамин Е.
6. Риба
Рибата е богата со омега-3 масни киселини, триптофан и витамин Б6, па педијатрите препорачуваат да му ја нудите на вашето дете најмалку два пати неделно.
7. Тиква, банана и авокадо
Тиквата содржи триптофан и серотонин, хемикалии за мозокот кои поттикнуваат релаксација, додека бананите се богати со витамин Б6, кој ги поддржува невротрансмитерите во мозокот за добро расположение. Исто така, бидејќи содржат комбинација од јаглехидрати и влакна, бананите помагаат да се стабилизира нивото на шеќер во крвта, спречуваат промени на шеќерот во крвта и поттикнуваат контрола на расположението. И на крај, авокадото – вкусна намирница која е богата со витамини, минерали и растителни влакна, а докажано делува и кај поттикнување на подобро расположение.
