Плодовата вода го опкружува бебето, а нејзиниот состав, количината и бојата, на лекарите им најавува некои проблеми. Во таа проѕирна и безбојна точност се присутни излупени клетки од кожата на бебето, заштитни маснотии кои ги лачат лојните жлезди (ја штитат бебешката кожа), белковини, јаглехидрати, минерали, хормони, супстанци кои предизвикуваат контракции на матката и поттикнуваат згрутчување на крвта, знаци на компатибилност Рх-фактор од мајката, урина…
Врз основа на анализата на урината која бебето ја излачува, лекарот може да утврди во каква состојба се неговите бубрези. Појавата на измет во плодовата вода укажува на недостаток на кислород, што бара итна интервенција. Дневно се создава од 400 до 1000мл плодова вода а нејзината количина зависи од големината на плодот и стадиумот на бременоста.
Механизмот за регулирање на количината на плодовата вода е многу сложен. Во него, освен постелката, активно учествува и бебето, кое проголтува, преработува и повторно лачи одредена количина на плодовата вода. Сепак, ниту недоволно, ниту премногу плодова вода е добро.
Вишокот на плодова вода (полихидроамнион), упатува на компликации кои обично се јавуваат меѓу 21. и 37. недела од бременоста.
Во случај на повеќе вода, матката создава дополнителен притисок на органите, па трудницата отежнато дише, чувствува слабост, и отекуваат нозете заради забавената циркулација и чувствува болка и тежина во желудникот. Премногу вода го отежнува и слушањето на срцевиот ритам на бебето, а бидејќи плодот има премногу место за да се движи, често се поставува во попречна положба, што го отежнува текот на продоувањето.
Недостаток на плодова вода (олигохидрамнион) се поврзува со неправилна работа на бубрезите на бебето и уринарните патишта.
Поради недостаток на простор, недоволно се движи, што може да остави негативни последици при развојот на скелетот. Недостаток на плодова вода може да биде последица од проблеми со постелката: со оглед дека оваа течност е производ од мајчиниот крвоток, нејзината количина се намалува ако циркулацијата на крв низ постелката е слаба.
Улога на плодовата вода:
- Го штити фетусот од надворешните влијанија правејќи го неговиот престој во стомакот поудобен
- Го штити бебето од инфекции
- Одржува стабилна температурата која е многу важна за нормален раст и развој на фетусот
- Таа е извор на течност која бебето ја голта и во која мокри
- Нејзиниот благ вкус го подготвува бебето на вкусот на мајчиното млеко
- Притисокот што го прави водата на ѕидовите на матката има голема улога при породувањето: по пукањето на водењакот и истекување на водата, на бебето му се ослободува патот за надворешниот свет
