Медицинскиот портал Педијатар.мк почнува со подкаст „ВАШ ПЕДИЈАТАР“ во кој главната улога ќе ја имаат врвни доктори, педијатри, неонатолози, пулмолози, нефролози, ОРЛ-специјалисти, логопеди, стоматолози… – сите оние коишто се грижат за здравјето и благосостојбата на децата.
Тука сме да дадеме одговори на сите Ваши прашања, да помогнеме во разрешување на дилемите со кои се соочувате, да дискутираме за резултатите од најновите истражувања и да зборуваме за новините во педијатријата, и сето тоа со една и единствена цел: да Ве поддржиме и да Ви ја олесниме една од најубавите, но и најодговорни улоги во животот – родителството. Да Ви помогнеме да израснете здрава и среќна личност.
Подкастот „Ваш педијатар“ ќе понуди одговори кои произлегуваат исклучиво од медицината базирана на докази, а се однесуваат на сите прашања и теми поврзани со растот и развојот на вашите малечки.
ТЕМА НА ПРВИОТ ПОДКАСТ „ВАШ ПЕДИЈАТАР“:
Имунизација на децата со д-р сци. Александар Сајковски
Стартуваме со актуелна тема – имунизацијата, која е едно од најголемите медицински достигнувања и најуспешен и најевтин начин за зачувување на јавното здравје. Но, и покрај огромните придобивки, опфатот со вакцини не е на посакуваното ниво од 95 %, кое е потребно за создавање колективен имунитет. Дел од родителите се уште со страв гледаат на секое боцкање на своето дете и неретко ги одложуваат или пак, прескокнуваат вакцините од редовниот Календар за имунизација, на тој начин загрозувајќи го животот на своето дете, но и на невакцираните лица од ризичните групи, на новороденчињата и воопшто, целото општество.
Вакцините спасуваат животи, а родителите, доколку имаат каква било дилема, треба да поразговараат со педијатрите. Токму затоа, на оваа тема, во првото издание на подкастот „ВАШ ПЕДИЈАТАР“ разговараме со нашиот гостин, доктор на медицински науки Александар Сајковски, специјалист педијатар, супспецијалист неонатолог.
