Летувањето со дете кое се уште не проодело може да биде доста предизвикувачко и исцрпувачко, особено ако веќе има некоја усвоена дневна рутина, бидејќи одеднаш сте се нашле со него во комплетно нова средина и со променети активности.
За да спречите некои стресни ситуации, како што е долго возење со автомобил до местото за одмор, страв од некои изненадни состојби како што е висока температира, осипи, цревни вирози, би било добро да изберете некое поблиско место во кое имате безбеден пристап до педијатар и аптека.
Изберете тивка плажа
На возраст до една година, децата можат да бидат чувствителни на непознати луѓе и поинтензивни гужви, затоа обидете се да најдете плажа што не е преполна со луѓе, а пристапот до морето да не биде комплициран. Ако тоа е невозможно, одете на плажа рано наутро или приквечер.
Како да го запознете детето со морето?
За време на многу топлите летни денови и бебето може да освежи во плиткото, но не предолго. Друго решение е да земете за на плажа мал базен за бебе во кој ќе ставите морска вода. Кога водата ќе се загрее на сонцето, седнете го детето во базенчето и придржувајте го. Лесните промени на температурата ќе ги поттикнат сите рецептори во организмот на детето, што го учи неговото тело на прилагодување. Првично држете го детето со лицето свртено кон вас, а потоа поттикнете на набљудување на светот околу него.
Ова се уште некои совети за првото влегување во море, со цел детето да не се истрауматизира и исплаши.
- Никогаш не го ставајте детето во море одеднаш и со сила. Непријатното чувство на студ ги одбива децата од водата, а не самата вода.
- За детето да се чувствува удобно во морето, потребно е и вие да се чувствувате удобно и да не се плашите. Вашите позитивни емоции ќе ги пренесете на детето.
- Секогаш држете ја главата на вашето дете над водата. Рефлексот за задржување на здивот постои до четвртиот месец од животот. Ако престанете да го активирате, детето најверојатно ќе се загрцне ако кратко време потоне во вода, што може да го загрози односот на детето кон морето.
- Кога ќе ставите детето во вода, навалете го лесно нанапред, тоа рефлексно ќе почне да мавта со нозете и рацете. Со овој рефлекс детето бара поддршка во водата. Во иднина, овој рефлекс ќе се развие во пливачки движења.
