Кога ќе се роди бебето, тоа изгледа толку мало и ситно што мислите дека не можете да направите многу со него. Главно во првите денови по раѓањето бебето го носите во раце, внимателно му ја придржувате главата, го држите во прегратка и тоа лежи, и тоа на грб.
Но, можете да почнете да го ставате бебето на стомак многу рано, за кое, тоа секако ќе се “бунтува“. Но, оваа положба е идеална за нејзиниот развој бидејќи го поттикнува детето да ја крене главата и на тој начин да ги зајакне мускулите на главата, вратот и рамената, а сето тоа влијае на подобар моторен развој.
Еве кои се придобивките од времето поминато на стомак:
- бебето практикува активности како што се вртење, седење и лазење
- поттикнува развој на грубата моторика
- се поттикнува работата на помалку искористените мускули на главата, вратот и рамената
- колку повеќе будно време поминато на стомак, толку е помала веројатноста да се формира залежано главче
- помага при проблеми со грчеви
За да го навикнете новороденчето на положба на стомак, можете да почнете да вежбате со него многу рано. Ставете го на стомак најмалку два до три пати на ден, а после првиот месец и почесто. Доколку се буни, почнете со варијации на положбата кои новороденчето полесно ќе ги прифати и кои ќе му помогнат да се навикне да лежи на стомак.
На раце. Ставете го бебето на вашата подлактица, со стомакот надолу, а со другата рака придржувајте го за грбот. Оваа положба помага при колики бидејќи воедно нежно го масирате детето со топли дланки и прсти по стомакот.
На вашиот стомак. Бебето лежи на вашиот стомак или на градите и со тек на време ја крева главата за да ве погледне.
На вашето рамо. Бебето лежи на вашето рамо и поради положбата со текот на времето почнува да ја крева главата.
Во вашата прегратка. Бебето лежи на колената на родителот во стомачна положба.
И… на подлога. Од 6-та недела можете да го легнете детето на стомак на тврда површина на подот, полека спуштајќи му ја главата. Многу е важно подлогата да биде тврда за да може детето да го почувствува своето тело и цврста поддршка кога ќе почне да се турка со рацете и да ја крева главата (избегнувајте дебели сунѓери или дебели меки подлоги бидејќи детето низ нив пропаѓа и не чувствува безбедност за учење на нови движења).
Најдобро е да правите такви вежби кога детето е сито и задоволно, што ќе ги зголеми шансите оваа поза да му се допадне и да му биде забавна. Играјте со шарени играчки до кои бебето со тек на времето ќе сака да стигне.
Положбата на стомак не е за спиење
Иако е пожелно да го ставите бебето во оваа положба во текот на денот, не се препорачува за ноќно спиење поради зголемениот ризик од ненадејна смрт на доенчиња. Затоа се препорачува да го ставите бебето да спие на грб.
