Со почетокот на празничната сезона, родителите чувствуваат притисок да ги “затрупаат“ своите деца со играчки, но новите истражувања укажуваат дека премногу играчки би можеле да имаат спротивен ефект врз развојот на детето. Иако децата сакаат играчки и многу родители веруваат дека повеќе играчки значат повеќе среќа, научниците предупредуваат на опасноста од преполните кутии за играчки.
Студија објавена во списанието Infant Behavior and Development открива дека помалку играчки поттикнуваат покреативна и поквалитетна игра кај децата. Во истражувањето учествувале истражувачи Универзитетот во Толедо, во американската сојузна држава Охајо, а анализирано било однесувањето на две групи од по 36 деца на од 18 до 30 месеци во текот на слободни игри. Едната група располагала со четири играчки, додека другата имала на располагање 16 играчки.
Резултатите покажале дека децата со четири играчки биле значително покреативни и се задржале подолго на една игра – дури 1,5 пати подолго од децата со повеќе играчки. Ограничениот избор на играчки им овозможил на децата повеќе да се фокусираат и да ја користат својата имагинација на поразновидни начини.
Студијата открила не само позитивното влијание од помалкуте играчки, туку и последиците од преполните кутии. Премногу играчки може да ја намалат способноста на детето да се фокусира, да создадат сензорно преоптоварување и да го отежнат чувството на одговорност за личните работи. Освен тоа, премногу играчки може да поттикнат конкурентна атмосфера меѓу браќата и сестрите, да го зголемат ривалството и да ги намалат чувствата на ценење за она што веќе го имаат.
Развој на креативност и одговорност преку ограничен број играчки
Помалку играчки ги поттикнуваат децата да размислуваат креативно и да ги комбинираат постоечките играчки на нови начини. Тие можат да си играат со камионот како да е вселенски брод, а едноставна коцка може да стане се што ќе замислат. Овој тип на игра поттикнува развој на вештини за критичко размислување и снаодливост.
Исто така, со помалку играчки, децата полесно се фокусираат, играта станува подлабока и развиваат чувство на одговорност кон она што го поседуваат. Помалку играчки не само што придонесуваат за нивната среќа, туку и за нивното емоционално и ментално здравје, заклучуваат истражувачите.
