♦♦♦♦♦♦♦
Британските научници почнаа со тестирање на третман за кој се надеваат дека може да помогне во сузбивање на најтешките последици од инфекцијата со Ковид-19 кај пациенти со тешка клиничка слика.
Имено, тие откриле дека пациентите кои страдаат од најтешката форма на Ковид-19 имаат исклучително низок број на клетки на имунолошкиот систем кои се нарекуваат Т-клетки.
Т-лимфоцитите или Т-клетките, покрај Б-лимфоцитите, се клетки на стекнат имунитет. Се активираат при контакт со својот антиген, молекула која поттикнува создавање на антитела, односно имунолошка реакција во организмот и вршат широк спектар на функции кои вклучуваат клеточен имунитет и регулирање на имунолошкиот одговор на организмот.
Во новото клиничко испитување ќе се евалуира ефектот на протеинот интерлеукин 7 што го зголемува бројот на Т-клетките и може да му помогне на пациентот да оздрави. Истражувањето го изведуваат, како што пишува Би-би-си, научници од Институтот „Francis Crick“, „King’s College“ Лондон и болницата „Guy’s and St Thomas“.
Тие ја проучувале крвта на 60 пациенти заболени со Ковид-19 и забележале огромен пад на Т-клетките.
Професорот Адријан Хејди од Институтот „Francis Crick“ изјави дека тој и колегите биле многу изненадени кога виделе што се случува со клетките на стекнатиот имунитет.
Како дел од оваа студија, истражувачите ќе им дадат интерлеукин 7 на пациенти со мал број на лимфоцити, кои минале повеќе од три дена на Одделот за интензивна нега
„Тие се обидуваат да го заштитат организмот, но се чини дека вирусот делува на начин што ги спречува да го сторат тоа, затоа што нивниот број е значително намален. Во микролитар (0,001 ml) крв, здраво лице во просек има помеѓу 2000 и 4000 Т-лимфоцити. Кај пациентите заразени со Ковид-19 кои ги тестиравме, имаше само помеѓу 200 и 1.200“, изјави Хејди.
Научниците велат дека ова откритие може да го отвори патот за развој на тест за утврдување на нивото на Т-клетки во крвта, што би можело да даде рани индикации за тоа кој пациент ќе развие потешка форма на болеста.
Резултатите, исто така, укажуваат на тоа дека со специфичен начин на лекување ќе може да се спречи падот на бројот на клетки на имунолошкиот систем.
Ману Шанкар-Хари, советник на Одделот за интензивна нега во болницата „Guy’s and St Thomas“, вели дека околу 70% од пациентите примени на одделот поради Ковид-19 стигнуваат таму со околу 400 и 800 лимфоцити на микролитар крв. Веднаш штом ќе почнат да се опоравуваат, нивото на лимфоцитите почнува да расте, додава тој.
Интерлеукин 7 веќе е тестиран на мала група на пациенти со сепса и докажано е дека сигурно го подигнува нивото на овие клетки.
Како дел од оваа студија, истражувачите ќе им дадат интерлеукин 7 на пациенти со мал број на лимфоцити, кои минале повеќе од три дена на Одделот за интензивна нега.
„Се надеваме дека откако ќе се зголеми бројот на овие клетки, општата состојба на пациентите ќе се подобри. Како доктор на Одделот за интензивна нега, секојдневно се грижам за пациенти во многу лоша здравствена состојба, поради што успехот на ваквиот третман би бил многу охрабрувачки“, рече Шанкар-Хари.
