Кога ќе слушнете дека вашето дете удрило друго дете, обично доживувате помал шок. Ако сте еден од родителите кои се трудат да ги воспитаат своите деца што е можно покоректно (хм, а како е тоа всушност?) и ако не трпите насилство и сте убедени дека вашето дете е најдоброто на светот, сигурно е тоа една реченица како „Вашиот го удрил мојот“ во парк, во обичен ден, може да ве исфрли од такт.
Па почнувате да размислувате: па не гледа никој што тепа некого, знае дека тоа е лошо, не му давам насилни цртани, а камоли филмови, внимавам да не види ништо слично, му давам силна љубов, зборувам, внимавам, воспитувам… Па зошто удрил друго дете?! И тука започнува вината. А заедно со вината доаѓа и стравот од уште полошо однесување што може да се случи и стравот дека ова ќе го слушнете и во градинка, па во училиште…
Но, тоа не е ваша вина. Добро? Речиси сигурно можеме да кажеме дека не е ваша вина. Ако правите се како што треба, нема страв дека се ќебиде уште полошо и дека тоа е поради некоја ваша постапка. Малку се деца кои никогаш нема да удрат друго дете порано или подоцна во нивното детство. Секако, тоа што е вообичаено не значи дека ќе дозволите и ќе оставите да се заборави штом ќе се случи, бидејќи на тој начин му давате до знаење на детето дека тоа е во ред – а вие не го сакате тоа.
Зошто децата удираат
Иако родителите можеби мислат дека детето само „го изгубило нервите“ или се налутило поради нешто и претерано реагира, удирањето е всушност нездрав начин на комуникација. Понекогаш тој удар е знак дека детето не развило посоодветни алатки за комуникација. Понекогаш им е тешко да ги контролираат своите емоции, па на тој начин всушност реагираат наместо да користат зборови.
Не е вусшност важно дали детето можело некаде да го види или доживее, па сега удира други, бидејќи тоа не е насоката во која сакате да се движите во решавањето на овој проблем. Ниту, пак, целта е да се намали важноста на удирањето на децата. Само не треба веднаш да паничите, туку полека обидете се да го решите проблемот.
Како да реагирате кога вашето дете удира
Ако вашето дете само повремено удира друго дете, важно е да останете смирени кога тоа ќе се случи за ситуацијата да не се влоши, а во исто време, детето може да види од прва рака како е да се остане смирен среде ситуација која е сè освен мирна.
Ако ја набљудувате оваа ситуација, важно е да бидете цврсти, но со смирен тон кажете нешто едноставно како „стоп“, „рацете кон себе“ или „без удирање“. Потоа дајте му шанса на детето да проба нешто поинакво, како на пример користење зборови за да идентификува што го налутило или испровоцирало. И не, не очекувајте или не го присилувајте вашето дете веднаш да се извини, особено ако се работи за дете под две години.
Ако забележите дека вашето дете почесто ги удира другите, не е лошо да разговарате за тоа со експерт – во градинка, училиште или на друго место.
Што да направите кога вашето дете ќе добие удар
Постои голема веројатност дека вашето дете во одреден момент ќе прими удар. Кога тоа ќе се случи, важно е да покажете сочувство и емпатија, фокусирајќи се на чувствата и благосостојбата на вашето дете. Потврдете ги чувствата на вашето дете и дајте му до знаење дека удирањето не е соодветен одговор. Кога се работи со доволно мали деца, кои не можат да го разберат значењето на извинувањето, одлична идеја е да им се даде можност да го „повторат“ она што довело до ударот – но само ако оцените дека тоа е соодветно и дека ќе биде добро прифатено од другата страна.
Ако родителот на детето што го удрило вашето не ја сфаќа ситуацијата толку сериозно колку што би сакале, едноставно тргенете се себеси и детето од тоа друштво, ако е можно. Ништо позитивно нема да дојде од некаков емоционален излив во таква ситуација. Ако често се среќавате со другото дете и со родителот, тогаш можеби е добра идеја да разговарате со родителот, но само кога ќе ги соберете мислите и кога децата ги нема.
Запомнете дека како што вашето дете не е злобно кога удира некого, ситуацијата е иста кога станува збор за обратен случај.
