Казнувањето на децата дефинитивно не им е омилена работа на родителите, но понекогаш мора и тоа да го направат за да ги натераат децата да сфатат дека одредено однесување не е прифатливо. Меѓутоа, мајките и татковците понекогаш не се сигурни на кој начин да го казнат детето во дадена ситуација.
Она што треба да го знаете е дека многу зависи од карактерот на детето, бидејќи на некои деца ќе им биде доволна многу мала, блага казна за да ја „научат лекцијата“, додека со оние поупорните ќе биде малку потешко. Исто така, најдобро е прво секогаш да поставувате јасни правила, за детето да знае во секој момент што смее, а што не, секогаш да се трудите да разговарате со него смирено и да прибегнувате кон казна само ако ништо од тоа не помага.
Правила за казнување
Би било добро да избегнувате да го казнувате вашето дете кога можете. На пример, ако видите дека вашето дете веќе се чувствува виновно, дека се кае што нешто лошо направило, казна не е неопходна. Понекогаш е доволно детето да ги разбере причините зошто некое негово однесување е погрешно.
Казната мора да биде во согласност со неприфатливото однесување за кое го казнувате. Премногу строгите казни кога за тоа нема потреба можат да направат спротивен ефект – детето ќе се налути, ќе биде навредено и огорчено и нема да чувствува каење за тоа што го направило.
Казната е еднократна и има одредени услови. Ако веќе сте го казниле вашето дете за нешто што го направило, не треба да му се враќате на тоа повторно. Или, ако веќе сте му забраниле да го гледа омилениот цртан филм како казна, не треба да додавате нови казни на тоа. Секогаш јасно кажувајте му на вашето дете дека казната е „таа и таа“ заради „тоа и тоа“ и придржувајте се до тоа.
Не го казнувајте детето за нешто што случајно го направило. По ненамерна грешка, доволно е да му објасните зошто тоа не е во ред и зошто не треба да го повтори тоа.
Казната треба да следи веднаш по однесувањето што сакате да го поправите бидејќи одложеното казнување нема толку добро воспитно дејство врз децата. Ако казните дете по една недела, сигурно нема да му биде јасно за што се последиците.
Секогаш детално објаснувајте му што точно не е во ред со неговото однесување, зошто и каква ќе биде казната. Понекогаш децата не ги разбираат правилата на однесување и ги кршат од незнаење, а не намерно.
Кажете му на вашето дете дека го сакате! Никогаш не заборавајте да му кажете јасно на вашето дете по казната дека го сакате, дека не сте незадоволни од него, туку од неговото однесување и дека се надевате дека тоа нема да се повтори.
Најбезбедни казни
Кога зборуваме за казни, или во овој случај да се каже дисциплинирање, постојат некои начини за кои може да се каже дека се безбедни:
- Забрана на омилена активност – гледање цртани филмови, играње со пријателите надвор, одење кај пријател. Внимавајте, сепак, казната да не биде премногу строга или да трае предолго.
- Исправување на последиците од грешка – ова може да биде многу ефикасен метод, на пример, да мора детето само да ја исчисти дамката на каучот што намерно ја направило.
- Извлекување заклучоци – многу е важно детето да разбере што згрешило и зошто не треба да го повтори тоа, па понекогаш е доволно да разговарате, оставете го да размисли и да донесе свој заклучок.
- Корисни задолженија – извршувањето на некои дополнителни домашни работи може да биде добра лекција за некои мали, особено за оние кои се невнимателни.
Како не треба да казнувате дете:
- Тепање
- Со навреда или понижување
- Со викање
- Со игнорирање
- Со лишување од храна, вода, сон, облека и други основни потреби.
Не заборавајте на крајот со детето да се „смирите“ и да го прегрнете по расправијата – нагласете му дека се уште многу го сакате и дека се надевате дека нема да има потреба од дополнителни казни.
