Повеќето стручњаци сметаат дека не постои “вистинско време” за основање семејство. Но, постојат и предности и недостатоци при раѓање во одредени години. Во 20. ќе имате повеќе енергија за трчање по детето и грижа за него, но веројатно помалку финансиски средства и секако помалку животно искуство на кое би можеле да се потпрете. Во 30. и 40. ќе бидете финансиски посигурни, но можеби потешко ќе забремените или потешко ќе ја одржите бременоста, а потребно е и да останете во чекор и да издржите до крај со вашето активно дете.
ОД 20 ДО 24 ГОДИНИ
- ТЕЛО
Ова се најплодни години, циклусот е најверојатно редовен и најчесто проследен со овулација. Во просек, жена на возраст од 20 до 24 години секој месец има околу 20% шанса да забремени ако има незаштитен однос.
Кога ќе забремените, веројатно ќе ви го проверуваат крвниот притисок при секоја посета на доктор, и покрај тоа што жена во овие години има мали шанси за хипертензија во текот на бременоста. Поновите истражувања покажуваат дека кај жената на таа возраст постои двојно помал ризик за развој на гестациски дијабетес отколку кај жена во 40., поради што кај жените под 25 години многу ретко се вршат вообичаените тестови за дијабетес.
- ЕМОТИВНА СОСТОЈБА
Како ќе се чувствувате во текот на бременоста зависи, во најголема мера, од тоа како стојат другите работи во вашиот живот. Некои жени, кој го одложуваат напредувањето во работата за да родат дете, може да се случи да имаат поделени чувства, па дури да се јави и огорченост на самиот почеток. Уште една од вообичаените грижи е промената на изгледот, која кај помладите жени е секако поизразена, а склони се и кон тоа да посветуваат поголемо внимание на својот брак, отколку на другите аспекти од својот живот, како на пример работата, па така вклучувањето на уште една личност во него, може да биде тешко.
- РИЗИК ЗА БЕБЕТО
Можноста за спонтан абортус во овие години е најниска, околу 9,5%. Поради тоа што јајце клетките се сеуште релативно млади, многу се помали шансите бебето да се роди со некаква аномалија (како што е Даунов синдром) или некои други хромозомски пореметувања. Но, сепак, кај оваа старосна група, бројот на деца родени со вакво пореметување статистички е најголем, затоа што кај овие жени изостанува тестирањето кое редовно се врши кај жените над 35 години, а преку кое на време се откриваат ваквите аномалии и после кое често доаѓа до прекинување на бременоста.
ОД 25 ДО 29 ГОДИНИ
- ТЕЛО
Ако се храните здраво и вежбате, а со тие навики продолжите и во текот на бременоста, поголема е шансата да се породите полесно и побрзо да се вратите во форма, во однос на оние жени кои помалку време им посветуваат на здравите навики. Иако е така во сите животни периоди, во текот на 20. сте во најдобра физичка форма, што значајно го олеснува породувањето и враќањето на тежината пред забременувањето.
Што се однесува до подолгорочното влијание на здравјето, некои студии покажуваат дека ако почнете со раѓање во своите 20., ќе бидете под помал ризик од заболување и развој на рак на дојките и јајчниците. Докторите сметаат дека хормоналните промени, кои се случуваат при овулација (зголемено ниво на естроген и прогестерон) ги стимулираат јајчниците и дојките секој месец, зголемувајќи ги шансите за добивање на овој тип на рак, а што почесто сте трудни, помалку пати овулирате.
- ЕМОТИВНА СОСТОЈБА
Во доцните 20. веројатно веќе сте изградиле стабилност на работен план, и во зависност од тоа кога сте стапиле во брак, вашиот однос со сопругот е веројатно во подобра форма да ги поднесе промените кои родителството со себе ги носи.
- РИЗИК ЗА БЕБЕТО
Стапката за спонтан абортус е околу 10%, нешто повисока отколку кај жените во рани дваесетти. Со 25 години, шансите да родите дете со Даунов синдром се 1 во 1250, а шансите да се роди дете со било која хромозомска аберација се 1 во 476 случаи.
ОД 30 ДО 34 ГОДИНИ
- ТЕЛО
Плодноста почнува да опаѓа околу 30. години, но оваа промена доаѓа постепено во наредните пет години. Ако е потребно да се лекувате од неплодност, шансите за успех во овие години се многу поголеми отколку кај постарите жени. Кај жените под 35 години успехот на ин витро оплодувањето се движи од 25-28%, додека кај жените преку 40 години, паѓа на околу 6-8%. Една студија открива и дека процентот на царски рез е скоро дупло поголем кај жените од 30 до 34 години, отколку кај оние во дваесеттите, иако лекарите не знаат зошто е тоа така.
- ЕМОТИВНА СОСТОЈБА
Жените кои во целост биле посветени на кариерата, во текот на своите 20. години, се во основа подготвени за создавање семејство на почетокот на новата деценија, а имаат и енергија и приходи за тоа. Но, можно е да се чувствуваат растргнати на повеќе страни. А може да се јави и загриженост за тоа дали ќе бидат во состојба да се вратат на својата кариера и дали воопшто ќе го сакаат тоа.
- РИЗИК ЗА БЕБЕТО
Во овие години ризикот од спонтан абортус е 11,7%. Кога ќе влезете во триесеттите, ризикот од раѓање дете со Даунов синдром е 1во 952 случаи, а бебе со друга хромозомска аберација 1 во 385.
