Здравствените работници од неколку американски држави пријавиле појава на вирус кој може да биде опасен за доенчиња помлади од 3 месеци, а кој може да предизвика напади (конвулзии), менингитис и други тешки заболувања.
Центарот за контрола и превенција на болести (ЦДЦ) издаде предупредување со кое ги информира лекарите и одделенијата за јавно здравје дека од мај се забележани случаи на зараза со пареховирус (PeV) кај новороденчиња и мали доенчиња.
Во предупредувањето не се наведува во кои држави е забележана инфекцијата, колку случаи се пријавени, ниту колкав е бројот на инфекции во однос на претходните сезони. Меѓутоа, советува системско следење на инфекцијата.
СИМПТОМИ И ШИРЕЊЕ НА ЗАРАЗАТА
ЦДЦ наведува дека во секој позитивен случај се работело за типот PeV-A3 кој најчесто предизвикува тешка болест. Овој вирус, вообичаен детски патоген кој циркулира во лето и есен, се шири со кивање, кашлање, плунка и фекалии и обично кај деца постари од 6 месеци предизвикува помалку сериозни симптоми на заболувањето.
Симптомите вклучуваат осип, инфекција на горните дишни патишта и висока температура. Експертите кои ја испитувале цереброспиналната течност кај бебињата со тешки инфекции со овој вирус откриле дека нивните бели крвни зрнца речиси целосно исчезнале. Засега не постои лек за оваа инфекција.
ЦДЦ ги замоли лекарите да ги тестираат доенчињата за кои постои сомневање дека се заразени со PeV и бебињата за време на лекувањето да ги задржат во посебни, оддели во болниците за да се избегне ширење на болеста во јаслите или одделенијата за интензивна нега на новороденчиња.
