За предвремено породување се смета секое породување што настанало пред комплетна 37. гестациска недела. Причините за предвремено породување се делат во две групи: причини од страна на мајката и причини од страна на детето. Лекарите советуваат трудниците да имаат правилен хигиено-диететски режим, рамнотежена исхрана, нормална физичка активност, грижа во текот на бременоста и најважната работа е редовна посета на гинеколог-акушер кој ќе ги направи сите потребни испитувања и ќе ги следи сите параметри кои би укажале на проблем.
- БЕБЕ
Главен ризик фактор се инфекциите кои може да се пренесат од мајката на бебето, како и вродените аномалии на дигестивниот и кардиоваскуларниот систем.
- МАЈКА
Најчесто се работи за постоење хронични болести пред почнување на бременоста – зголемен крвен притисок, дијабетес и други хронични болести кои може да доведат до предвремено породување.
Некои од тие болести може да се јават и во текот на бременоста, но се ризик-фактор за предвреме да заврши бременоста. Нередовните контроли пред се може да доведат до превид на можна инфекција која може да се јави во урогениталниот тракт и да биде причина за предвремено породување.
Една од причините може да бидат и аномалиите на урогениталниот тракт, повеќеплодната бременост најчесто завршува со предвремено породување (придонес дава и ин витро фертилизацијата каде се случува да има повеќе од еден плод ). Секако, важна улога имаат и условите во кои живее родилката, консумирање алкохол, медикаменти, дрога, пушење цигари, возраста (премлади под 18 години или по 35 година).
