Најчесто грчевите може да ги препознаете по честиот и долготраен плач кај бебето, кое секогаш претходно било весело и спокојно. Бебето е сито и наспиено, но сеедно неутешно плаче. Грчевите најчесто се јавуваат во ист период од денот.
Иако не се опасни за детето, тешко е да се гледа како бебе плаче, па едвај ќе чекате да поминат. Најчесто почнуваат помеѓу втората и четвртата недела, а може да потраат и до четвртиот месец од животот на детето.
Ако вашето бебе често плаче, особено во попладневните и во вечерните часови, и ги повлекува нозете кон стомачето и го витка грбот, веројатно се работи за грчеви. Еднакво често се јавуваат и кај доените деца и децата кои се хранат со адаптирано млеко.
