Кашлицата кај децата е еден од симптомите кои најчесто се јавува во текот на првите години од животот, како и во училишната возраст. Таа се јавува кога телото на детето настојува да се ослободи од слуз или од страно тело. Кашлицата често се игнорира, речиси секогаш под претпоставка дека ќе исчезне, или дека се работи за краткотрајна вироза.
Неретко, таа станува хронична, симптомите се поизразени и тогаш е веќе јасно дека причината е посериозна. Според звучната манифестација се разликува продуктивна и сува кашлица. Најчести причинители за кашлицата се инфекциите на горните дишни патишта предизвикани од вируси.
ТИПОВИ НА КАШЛИЦА
Сува/ноќна кашлица Сува, длабока и атипична, обично се јавува во сред ноќ. Оваа кашлица ја следи звук кој потсетува на звуците што ги испушта фока.
ПОМОШ: Седнете со детето околу пет минути во бања исполнета со пареа (влагата ќе стимулира спуштање на слузта од белите дробови и ќе ја ублажи кашлицата). Во текот на ноќта, задолжително отворете прозор во спалната соба (свежиот воздух го ублажува отокот на слузницата на дишните патишта) и избегнувајте користење клима уред. Сепак, ако кашлањето се влошува, или детето отежнато диши, веднаш повикајте лекар. Во тој случај, на детето веројатно му е потребен лек против воспаление. Во спротивно, кашлицата ќе се повлече по три-четири дена.
Кашлица со многу слуз: Зрела, без забрзано или отежнато дишење и пропратни пискави звуци.
ПОМОШ: Чистете му го носето на детето што почесто, оти слевањето на слузта во ждрелото поттикнува кашлица. Кај бебињата и малите деца, кои не можат сами да го издуваат носот, користете капки за нос и пумпа за извлекување на слузта. Секако, пред користење на било кој медикамент, посоветувајте со педијатар. Ако и по една седмица не дојде до подобрување (носот и натаму е затнат, а кашлицата не престанува), обратете се кај лекар. Упорните симптоми може да укажуваат на синузитис (бактериска инфекција на синусите, која се развива од обична настинка), или предупредуваат на алергија, астма или воспалние на белите дробови.
Кашлица со отежаното дишење: Сува, при што детето во настојување да дојде до воздух, отежнато дише.
ПОМОШ: Јавете се на лекар ако по една недела кашлицата на детето станува поинтензивна. Бебињата обично мораат да бидат хоспитализирани, поради контрола на кашлицата и ослободување на слузта од грлото. Болеста се лекува со антибиотици, иако овој тип на кашлица (пертусис) може да потрае со недели, па дури и месеци.
Свирење во градите: Упорна, проследена со звук сличен на свирење, проследена со отежнато дишење, и обично трае подолго од 10 дена. Состојбата особено се влошува во текот на ноќта или ако детето е изложено на полен, ладен воздух, прашина, чад или ако се нашло во близина на животни.
ПОМОШ: Ако болеста се јави во поблага форма, симптом на астма обично е хронична кашлица. За поставување дијагноза непоходен е лекарски преглед, а педијатарот треба да се информира за сите случаи на алергија, астма или егзема во семејство (ако ги има), оти тоа го зголемува ризикот да заболи и вашето дете.
Рапава кашлица: Рапава, се јавува во еднакви интервали, може да биде сува или зрела.
ПОМОШ: Обратете се кај лекар ако телесната температура на детето е над 38 степени, ако упорно повраќа, има пролив или одбива да јаде и да внесува течности. Важно е да се нагласи дека овој вид на инфекција може да се јави во било кој период од годината, иако е почеста на пролет и во есен.
