Покрај бљуцкањето и икањето, грчевите (колики), зелената столица, констипацијата, дијареата, како проблеми во исхраната на бебето може да се јават и неухранетост и прејадување.
Што ги предизвикува и како да му се помогне на бебето, советува д-р Јасминка Комненовиќ, педијатар-нутриционист.
НЕУХРАНЕТО БЕБЕ
Добро нахрането бебе обично се смирува и заспива непосредно по хранењето. Недоволно нахрането бебе, продолжува да биде немирно и се буди еден-два часа по оброкот, оставајќи впечаток на гладно дете. Овие знаци на лоша исхрана не се секогаш очигледни и родителите не ги разбираат.
Неухранетоста може да биде резултат на нервоза или неудобна положба при хранењето, или поради тешкотии со џвакањето и голтањето, како и поради неадекватна техника на хранење или грешки при подготовката на формулата.
Добивањето на тежина помалку од 200гр неделно кај доенче помладо од четири месеци укажува на неадекватна исхрана. Доено бебе кое не добива доволно на тежина може да се мери пред и по подој неколку пати, за да се измери количината на внесено млеко. Ако таа количина не е доволна, може да се додаде формула.
ПРЕЈАДУВАЊЕ КАЈ БЕБЕ
Прејадувањето настанува кога на доенчето му се дава повеќе храна отколку што му е потребно. Се јавува кога доенчето автоматски се храни штом заплаче, кога шишето му се дава како разонода, и кога родителите даваат храна како награда или кога очекуваат да детето ја изеде наменетата количина иако не е гладно.
Прејадувањето се препознава по пребрзото зголемување на телесната тежина. Индиректни знаци на прејадување се плач, претерано бљуцкање по оброк и дијареа. Долгорочното прејадување може да доведе до гојазност.
