Настинките се всушност најголемиот проблем на децата, вели проф. д-р Бранимир Несторовиќ, најценетиот српски детски пулмолог од Универзитетската детска клиника “Тиршова“ во Белград. Околу 70% од здравствените проблеми кај децата се токму од разните инфекции. Децата до четвртата година градат имунитет, а дури до петта година не умеат да искашлаат секрет и тоа им создава проблем и го продолжува процесот на оздравување. Инаку, додава проф. д-р Несторовиќ, самата кашлица кај децата во 90% од случаите е безопасна.
“Еден Американец истражувал и на крајот пресметал – ако во текот на денот се накашлате до 34 пати, тоа е релативно безопасно. Над таа бројка е знак за аларм“, вели во шега проф. д-р Несторовиќ.
“Она од кое се плашат многу родители чии деца често боледуваат од бронхитис е астмата. Сепак, донекаде може да здивнат. Честите бронхитиси не се сигурен пат кон астма. Тоа е генетска болест и оној кој треба да ја добие, ќе ја добие секако. Најчест тригер за астмата е кивавицата, а ако децата не ја добијат до четвртата – петта година, многу е мала шансата да ја добијат подоцна“, додава проф. д-р Несторовиќ.
“Родители, детето треба да се гали, оти кога тоа го правите се лачи окситоцин – хормон на среќата, а тоа е нешто фантастично за имунитетот“, открива познатиот детски педијатар.
На прашањето дали студениот воздух му штети на детето, лекарот објаснува дека неодамна е објавена студија, заснована на истражувања кои докажале дека ако се вдишува студен воздух и дишните патишта се разладат под 32 степени, ризикот од респираторни инфекции е за четири пати поголем.
За тоа, што е она што им пречи на детските бели дробови, проф. Несторовиќ објаснува:
“Станавме премногу чисти. Се капеме повеќе пати во отекот на денот. Употребата на антибиотици не стивнува, храната е полна со хормони, а амбалажата во која се пакува е полна со естроген. Знаците за рециклажа никој не ги чита, но треба да се погледнат и да се купува само ако на амбалажата стои бројката 2, 3 или 5“, објаснува проф. Несторовиќ.
Говорејќи понатаму за тоа што им пречи на децата, лекарот додава дека нашите генерации немаат стимул за имуниот систем, па тој ништо не може да научи и затоа реагира на бесмислености. Одговорот на нашиот имун систем кој се уште каков-таков е стар, а сега почнуваме да ја плаќаме и сметката на цивилизацијата – мобилни телефони, интернет, па дури и дизел честичките“.
“Колку повеќе децата имате дома, секое следно ќе има помали шанси да заболи од астма. Едноставно е – беспрекорната чистота се намалува со секое следно дете. Претераната хигиена е наш непријател“, дециден е познатиот детски пулмолог.
