Болните од Ковид-19 треба да пијат многу течности и да земаат витаминска терапија. „Ц витамин, но претпазливо, затоа што може да ги оштети бубрезите. Цинк, некои антиоксиданти, Д витамин од 2.000 до 4.000 интернационални единици. Но она што е важно, е дека не би сакал граѓаните да земат парацетамол непотребно“, потенцира проф. д-р Докиќ
♦♦♦♦♦♦♦
Проф. д-р Дејан Докиќ, пулмолог алерголог, зборувајќи за клиничката слика на пациентите со Ковид-19, истакна дека околу 80 проценти од заразените коронавирусот го поминуваат во домашни услови, а во болниците доаѓаат оние кои се во тешка состојба и дека тие се сите со многу ниска сатурација. Тој рече дека вирусот SARS-CoV-2 е многу непредвидлив и е опасен и за ризичните групи, но и за оние кои немаат коморбидитети.
„Има пациенти со неколку коморбидитети, па се извлекле. Јас причината ја гледам во самиот имун систем и на кој начин тој успева да се бори. Вирусот е многу подмолен. Го измамува имуниот систем, кој добива погрешна информација. Влегува SARS-CoV-2, го нарушува целиот програм на одбраната и организмот добива сосема погрешна информација и затоа прекумерно реагира со создавање на тие цитокини и таа позната цитокинска бура од која ретко некој се спасува“, нагласува проф. д-р Докиќ.
Во однос на лекувањето се потенцира дека земањето антибиотици на своја рака може да донесе несакани дејства и дека секоја терапија задолжително треба да се зема по препорака на лекар и според соодветните анализи.
Ова е вирус, сите знаат и матичните лекари и малите деца. За вирус не се дава антибиотик. Се додека имате симптоми на вирус и немате знаци биохемиски, клинички, лабораториски или на рендгенска снимка дека има бактериска инфекција нема потреба да се зема антибиотик, па и при зголемена температура
Многу течности и витаминска терапија
Проф. д-р Докиќ советува за болните од Ковид-19 дека основно е да се пијат многу течности и да се земе витаминска терапија.
„Ц витамин, но претпазливо, затоа што може да ги оштети бубрезите. Цинк, некои антиоксиданти, Д витамин од 2.000 до 4.000 интернационални единици. Но она што е важно, е дека не би сакал граѓаните да земат парацетамол непотребно. На температура 37,2 тие земаат парацетамол. Температурата е дел од одбранбениот систем. Температуратa над 39, само од тие причини се зема да се намали, и тоа не драстично, туку да живне организмот. Антибиотиците строго ќе се даваат онаму каде имате индикација за бактериска инфекција. Ова е вирус, сите знаат и матичните лекари и малите деца. За вирус не се дава антибиотик. Се додека имате симптоми на вирус и немате знаци биохемиски, клинички, лабораториски или на рендгенска снимка дека има бактериска инфекција нема потреба да се зема антибиотик, па и при зголемена температура. Доколку има CRP раст, доколку имате леукоцитоза и покрај тоа што лимфоцитите се намалени при бактериска инфекција, ќе пораснат леукоцитите, ќе пораснат некои други параметри во крвта имате прокалцитонин, тоа е една супстанца која точно ви кажува дека имате бактериска инфекција, имате компјутер точно се знае како изгледа една бактериска суперинфекција на пневмонија, во такви случаи ќе дадете антибиотик по водичите кои тоа го препишуваат, појасни проф. д-р Докиќ при гостувањето на ТВ 21.
