♦♦♦♦♦♦♦
Научниците од Хонгконг го потврдија првиот случај на повторна инфекција со коронавирус кај лице која веќе оздравело од вирусот. 33-годишен пациент, жител на Хонгконг, прв пат бил тестиран позитивно на 26 март, откако покажал симптоми на COVID-19 како кашлица, главоболка, болки во грлото и покачена телесна температура.
Откако оздравел, двапати бил тестиран и двапати бил негативен. Сепак, на 15 август, тој повторно бил позитивен на тестот за коронавирус.
Овој пат, тој немал никакви симптоми: неговата болест е откриена случајно поради тест на аеродромот во Хонгконг, каде што се вратил од Шпанија преку Велика Британија.
Проф. д-р Лауч: Тој случај не докажува дека некој може да се разболи двапати
Хрватскиот научник проф. д-р Гордан Лауч, на својот ФБ профил ја коментираше можноста лице кое веќе оздравело од коронавирус повторно да се зарази со него.
„Лицето во Хонгконг било позитивно на вирусот со многу благи симптоми, неколку месеци подоцна повторно му е детектиран вирусот во носот, а со секвенционирање е потврдено дека се работи за друг сој на вирусот, значи несомнено се работи за повторна инфекција. Овој пат без никакви симптоми“, пишува професорот.
„Овој случај не докажува дека некој може да се разболи двапати. Ова само потврдува дека дури и лесна форма на болеста го стимулира развојот на имунитетот и дека вториот пат организмот уште полесно се изборува со вирусот (вториот пат немало никакви симптоми). Вирусот во носот потврден со PCR-тест не значи дека некој е болен. Сè уште не е потполно јасно дали такво лице може да го шири вирусот во доволни количини за некој да се разболи после контакт со него.
Од друга страна, лицето кое сè уште нема симптоми, а ќе ги развие за 2-3 дена, распрснува голема количина на вирус и може да зарази други луѓе“, објасни проф. д-р Лауч.
