Куба во понеделникот стана првата земја во светот што вакцинираше деца на возраст од две години и постари со вакцина против Ковид-19, притоа користејќи домашна вакцина која се уште не е одобрена од Светската здравствена организација.
Државата со 11,2 милиони луѓе има намера да ги вакцинира сите деца пред повторно отворање на училиштата, од кои повеќето се затворени од март 2020 година. Тие беа отворени само неколку недели кон крајот на минатата година, но повторно беа затворени во јануари.
- Новата учебна година започна во понеделник, но часовите се одржуваат преку телевизиски програми, бидејќи повеќето кубански домаќинства немаат пристап до интернет
По завршувањето на клиничките испитувања врз малолетници со своите вакцини Абдал и Соберан, Куба во петокот започна кампања за вакцинација на деца на возраст од 12 години и постари.
За разлика од многу други вакцини, рекомбинантните ДНК вакцини не бараат складирање на екстремно ниски температури
Дистрибуцијата на вакцини за возрасната група од 2 до 11 години започна во понеделникот во централната провинција Сиенфуегос.
Вакцинацијата на деца на возраст од 12 години и постари е одобрена во неколку други земји, а некои спроведуваат испитувања на помали деца. Земјите како Кина, Обединетите Арапски Емирати и Венецуела објавија дека планираат да вакцинираат и помали деца, но Куба е првата што го стори тоа. Чиле во понеделникот ја одобри кинеската вакцина Синовак за вакцинирање на деца на возраст од шест до 12 години.
Кубанските вакцини против Ковид-19 се првите вакцини развиени во земјите од Латинска Америка, но тие не го поминаа меѓународниот научен преглед. Се засноваат на рекомбинантна протеинска технологија, истата што ја користеа американскиот Новавакс и францускиот Санофи. И обете чекаат одобрување од СЗО.
За разлика од многу други вакцини, рекомбинантните ДНК вакцини не бараат складирање на екстремно ниски температури, пренесува „Хина“.
