Детскиот психолог Сем Вас за британски „Мирор“ споделува предупредувачки знаци кои на родителите на суптилен начин можат да им откријат дека нешто не е во ред со нивното дете. Како што објасни, секое дете е различно и со емоциите се справува на свој начин, поради што понекогаш е тешко да се забележат проблемите.
„Иако секое дете е специфично, ние психолозите тежнееме да го категоризираме она што не е во ред со детето на два различни начини. Првиот е нешто што во струката го нарекуваме екстернализирачко однесување, а се појавува кога детето се чувствува лошо и потоа тоа го изразува со одредени агресивни гестикулации. Така детето често ќе го удира братот или сестрата, ќе крши работи и слично“, објасни тој.
Психологот додава дека има уште еден, сосема поинаков знак дека нешто не е во ред со детето. Станува збор за таканаречено интернализирачко однесување за кое е специфично прикривање и задржување на чувствата во себе.
„Интернализацијата е сосема спротивна шема. Таквото дете нема да покаже дека има проблеми, туку истите тие проблеми ќе ги трупа во себе“, предупредува Вас и тврди дека родителите најлесно ќе го препознаат ваквото однесување ако детето одеднаш почне да избегнува разговор, да се повлекува во себе или да јаде помалку.
