Осаменоста не ги погодува само возрасните, таа станува се почеста појава и кај децата. „Гледаме дека осаменоста и понатаму силно влијае врз децата, без разлика дали станува збор за прилагодување на ново училиште, проблеми со пријателствата или чувство на исклученост додека гледаат како другите се забавуваат на интернет. Осаменоста може долгорочно да влијае на менталното здравје на децата и самодовербата на децата“, објаснува експертот Шон Фриел.
Психотерапевтот Алиша Итон предупредува дека детската осаменост е во пораст поради недостаток на спонтано дружење, се подолго време пред екраните и родителските стравови кои ги ограничуваат социјалните интеракции. „Не се работи само за физичка изолација, туку за чувство дека не припаѓаат или не се ценети“, напоменува таа. Еве како да им помогнете на децата да не се чувствуваат осамено.
- Отворена комуникација
Фриел ги советува родителите да ги охрабруваат децата да зборуваат за своите чувства и да ги слушаат без осудување. „За многу деца, овие чувства можат да бидат преголеми, што ќе ги наведе да се повлечат од социјалните ситуации и да избегнуваат да бараат поддршка. Затоа е важно да се создаде средина каде што ќе се чувствуваат безбедно да ги изразат своите емоции“, вели Фриел.
- Откријте ја причината за проблемот
Важно е да се разбере зошто детето се чувствува осамено и да се разберат неговите емоции. Итон објаснува: “Кога детето се чувствува како никој да не го разбира, тоа се нарекува емоционална осаменост. Дури и кога е опкружено со луѓе, може да се чувствуваат изолирано ако немаат силна врска со некој на кој му веруваат – без разлика дали тоа е родител , брат или сестра или најдобар пријател.“
Фриел истакнува дека децата можат да бидат осамени од различни причини и важно е нежно да се истражи причината. Без разлика дали имаат потешкотии со пријателствата, се чувствуваат исклучени или минуваат низ промени, разбирањето на проблемите помага да се обезбеди вистинската поддршка.
- Поттикнете дружење
Обезбедувањето можности за дружење со врсниците може да им помогне на децата да се чувствуваат помалку осамени. „Зачленувањето во клуб, започнувањето на ново хоби или едноставно поминување поквалитетно време со семејството често може да ги ублажи чувствата на осаменост“, истакнува Фриел.
- Помогнете им да изградат самодоверба
Прославете ги успесите на вашето дете и потсетете го на позитивните врски, советува Фриел. „Осаменоста може да поттикне сомнеж во себе, но истакнувањето на нивните силни страни и достигнувања помага да се врати самодовербата“, вели Фриел. Итон додава дека зајакнувањето на самодовербата може да го намали чувството на исклученост бидејќи децата кои не можат да се поврзат со своите врсници често се чувствуваат како да „стојат на страна додека сите останати припаѓаат некаде“.
- Создадете средина за поддршка
Осаменоста не се решава со еден разговор, туку со постојана поддршка, вели Фриел. „Редовните разговори, интересот за чувствата на детето и уверувањето дека не се сами му помагаат да се чувствуваат ценети и поврзани. Итон истакнува дека осаменоста може да ја оштети детската самодоверба и да го зголеми ризикот од анксиозност и депресија.
„Децата треба да чувствуваат дека се важни и сакани. Препознавајќи ја осаменоста навреме, можеме да им помогнеме да прераснат во среќни и самоуверени луѓе“, заклучува.
