Можеби мислите дека вашето дете не обрнува внимание на сè што се случува околу него, но експертите истакнуваат дека децата честопати гледаат, слушаат и разбираат повеќе отколку што би можеле да очекуваме. И не станува збор само за зборовите што директно им ги упатуваме, туку и за начинот на кој зборуваме за себе, за другите и за нив самите, како и за нашите секојдневни постапки.
Психолозите откриваат кои пораки децата несвесно ги впиваат и како можеме да ги претвориме во можности за позитивно влијание.
- Како зборувате за вашиот партнер/ка и блиските луѓе?
Дали мислите дека вашето дете не забележува кога превртувате очи кон вашиот партнер или кога давате саркастичен коментар за вашата баба? Грешите. „Децата и тоа како ја забележуваат динамиката меѓу возрасните, дури и кога се во другата соба“, објаснува психологот Џазмин Мекој.
Позитивниот говор за другиот родител или старатели, дури и во нивно отсуство, поттикнува чувство на сигурност и емоционална стабилност кај детето.
- Како зборувате за своето тело
Децата многу брзо ги впиваат пораките за телото, не само преку зборови, туку и преку однесување. „Ако постојано бришете свои слики или избегнувате огледала, децата заклучуваат дека постои „нешто погрешно со телото“ , вели Алиса Милер.
Возрасните несвесно го обликуваат односот на детето кон сопственото тело, па затоа е важно да се испраќаат пораки на прифаќање и грижа.
- Што ви е навистина важно
Можеби ќе кажете дека спортот е важен за забава и тимски дух, но ако прво прашате „Кој победи?“ , детето ќе запомни дека победата е најважна. „Децата не учат вредности од она што го кажуваме, туку од она што постојано го правиме“, потсетува психологот Лаура Маркам.
- Како се однесувате кон себе
Ако сте премногу строги кон себе поради грешки, постои голема веројатност дека вашето дете ќе го стори истото. „Возрасните на кои им недостасува самосочувство честопати несвесно ги учат децата да бидат критични кон себе“, вели Милер. Од друга страна, прифаќањето на грешките и нежната внатрешна комуникација ги учат децата на отпорност.
- Како зборувате храната
Изјави како „тоа е лошо“ за колачињата, етикетирање на храната како „добра“ или „лоша“ или изразување вина по јадење, сето тоа се работи што децата ги слушаат и ги паметат. „Нашите ставови кон храната ги обликуваат нивните навики во исхраната во текот на целиот живот“, објаснува Милер.
Наместо забрани и срамење, подобро е да се негува избалансиран и позитивен однос со храната.
- Како зборувате за вашето дете пред други
Ако на шега му се жалите на вашиот партнер откако вашето дете избувнало во продавницата, вашето дете можеби нема да ги разбере сите зборови, но ќе го почувствува тонот и значењето. „Тоа може да им ја оштети самодовербата и чувството на поврзаност“, предупредува Мекој. Наместо да се фокусирате на грешката, зборувајте за научената лекција и како заедно ја решивте ситуацијата.
