Мутиран вирус, сличен на настинка, кој е поврзан со парализа кај деца и синдром на ненадејна смрт на доенче, тивко се шири во Англија, предупредуваат експертите.
Вирусот, познат како ентеровирус-C105 (EV-C105), повеќе од една деценија се сметаше за „редок“, но сега за првпат е откриен пораст на случаи низ Европа. Нови податоци претставени на конференцијата ESCAIDE во Варшава минатата недела открија 111 случаи на овој вирус во девет европски земји во 2023 година. Ова е зголемување во однос на само 27 случаи во претходните 15 години откако вирусот беше првпат идентификуван.
Повеќето досега пријавени инфекции се кај деца што е „загрижувачки“ тренд, изјави експерт за британски Сан. И речиси две третини од случаите во 2023 година (80) биле откриени во Англија, правејќи ја епицентар на најновата и единствена епидемија.
Кај повеќето луѓе, вирусот предизвикува само лесни симптоми слични на настинка, како треска, кашлица и болка во градите. Во ретки случаи, особено кај деца, може да предизвика невролошки проблеми, вклучително и парализа слична на полио, наречена акутна флакцидна парализа (AFP), и отекување на мозокот, менингитис. Вирусот исто така е поврзан со еден случај на синдром на ненадејна смрт на доенче (SIDS), кај деветмесечно бебе кое имало EV-C105 како и неколку други вируси.
Се верува дека новиот, мутиран облик на истиот вирус стои зад 20 од најновите случаи, од кои повеќето исто така се откриени во Англија. Д-р Лаура Буба, микробиолог во Светската здравствена организација и автор на најновото истражување, изјави дека новиот сој може да биде „потежок“ и да резултира со „повеќе невролошки случаи“ отколку оригиналниот вирус.
Кај повеќето луѓе, вирусот предизвикува само лесни симптоми слични на настинка, како треска, кашлица и болка во градите. Во ретки случаи, особено кај деца, може да предизвика невролошки проблеми, вклучително и парализа слична на полио, наречена акутна флакцидна парализа (AFP), и отекување на мозокот, менингитис
Таа рече дека вирусот се приспособил да ги избегнува стандардните тестови, што буди стравувања дека вистинскиот број инфекции може да биде многу поголем, бидејќи се шири тивко во неговата нова форма.
Новите податоци, собрани во име на Европската мрежа за неполио ентеровируси, сугерираат дека седум проценти од децата заразени во 2023 година имале невролошки симптоми. „Ова е главната грижа за мене“, вели проф. Пол Хантер, експерт по медицина на Универзитетот во Источна Англија. „Ова е дефинитивно нешто што треба внимателно да го следиме“, додаде тој.
Но британските здравствени власти нагласуваат дека мутациите не значат нужно дека вирусот станува поопасен. Кристина Селма, од Агенцијата за здравствена безбедност на Обединетото Кралство, рече: „Забележавме зголемување на случаите на EV-C105 во 2023 година, но не се пријавени тешки симптоми, и случаите на овој сој постепено се намалуваат.“
Проф. Хантер додаде: „Минатите епидемии на други ентеровируси најчесто доаѓаа и си одеа,“ објасни тој. „Но тоа не значи дека овој нема да предизвика посериозни проблеми во следните неколку месеци.“
Родителите треба да побараат медицински совет ако нивното дете развие многу силна главоболка, вкочанет врат, потешкотии во движење на раката или ногата, необична слабост или млитави екстремитети, или отежнато дишење
Ентеровирусите се големо семејство на вируси кои најчесто предизвикуваат лесни инфекции како настинка, осипи и стомачни тегоби. Но некои типови, вклучително и EV-D68 и EV-A71, претходно предизвикале епидемии со парализа слична на полио кај деца. EV-C105 првпат бил идентификуван во 2010 година во Демократска Република Конго кај дете кое починало од AFP, и досега се појавувал само спорадично ширум светот.
Кристина рече дека лабораториите во Британија можат да го откријат вирусот и покрај неговите мутации. „Во Британија, дијагностичките лаборатории користат различни тестови за откривање на ентеровируси, и нашата способност да ги идентификуваме промените во геномот сугерира дека досега нема значително влијание врз нашата можност да го идентификуваме овој сој,“ рече таа.
EV-C105 предизвикува симптоми слични на други зимски вируси, како треска, кашлица, воспалено грло или настинка со притисок во градите. Родителите треба да побараат медицински совет ако нивното дете развие многу силна главоболка, вкочанет врат, потешкотии во движење на раката или ногата, необична слабост или млитави екстремитети, или отежнато дишење, пишува Сан.
СИМПТОМИ НА ЕНТЕРОВИРУС
Симптомите на лесна инфекција може да вклучуваат:
- треска,
- течење од нос, кивање, кашлица,
- осип на кожата,
- плускавци во устата,
- болки во телото и мускулите.
Симптомите на посериозна инфекција вклучуваат:
- вирусен конјунктивит,
- болест на „рака-стапало-уста“,
- вирусен менингитис (инфекција на обвивките на ‘рбетниот мозок и/или мозокот),
- вирусен енцефалит (инфекција на мозокот),
- миокардит (инфекција на срцевиот мускул),
- перикардит (инфекција на обвивката околу срцето),
- акутна флакцидна парализа (ненадејна слабост на една или двете раце или нозе),
- воспалителна болест на мускулите (бавна, прогресивна мускулна слабост).
