Потребно:
- 3 поголеми тиквици
- 200гр мелено месо (мешано, или по желба)
- 1 главица кромид
- 3 чешниња лук
- 1 црвена пиперка
- 1 жолта или зелена пиперка
- 10гр цвет од брокула
- 150гр варен ориз
- 100гр замрзнат грашок
- 150гр кашкавал
- Масло за јадење
- Зачини по желба
Подготовка: ФИЛ: Во тавче загрејте масло и пропржете го ситно исечканиот кромид. Кога ќе омекне, додадете го меленото месо и зачинете со сол, бибер и останати зачини по желба. Кога месото ќе добие убава румена боја, додадете ги пиперките исечени на коцки, грашокот, оризот и брокулата иситнета на помали парчиња, како и ситно исечканиот лук. Пржете заедно неколку минути постојано мешајќи, а по потреба може да додадете и малку вода.
Тиквичките измијте ги и исечете ги на половина по ширина. Издлабете ги колку што е можно повеќе со лажица, така да остане само дното и ѕидовите на тиквичката. Непосредно пред полнењето, во филот додадете 1/3 од изренданиот кашкавал. Издлабените тиквички наредете ги во тава, претходно обложена со хартија за печење и наполнете ги рамномерно со филот. Преку полнетите тиквици распоредете еднаква количина од преостанатиот кашкавал. Печете во загреана рерна на 180 степени, околу 25-30 минути.
