Смутито е привлечно дури и за пребирливите деца. Ако имате проблеми со дете кое тешко внесува храна богата со протеини, смути е добар избор. Од овошни вкусови, до кремасти текстури, смутито ќе му ги понуди сите потребни хранливи состојки во само една чаша. Експериментирајте со јогурт, тофу и други намирници богати со протеини. Ова се два наши предлога.
Овошно задоволство
Измиксирајте една мала шолја сок од портокал, три смрзнати јагоди, една шака смрзнати боровници и ¼ шолја свежо сирење (млада урда). Вкусот можете да го менувате така што ќе користите различни сокови како основа. Ако користите смрзнато овошје, смутито ќе биде покремасто.
Смути диносаурус
Ако вашето дете инаку не сака да јаде зелен зеленчук, скријте го во вкусно смути. Измиксирајте шолја сок од јаболка и една банана, и спанаќ или друг зелен зеленчук по желба. Смутито по миксирањето ќе биде зелено, но ќе преовладува вкусот на банана, и детето ќе ужива во секоја голтка.
