Начинот на кој родителите ги воспитуваат своите деца влијае не само на нивниот меѓусебен однос, туку и на развојот на детето во целина. Како што објаснуваат експертите, постојат одредени грешки во воспитувањето кои му штетат на детето и можат негативно да влијаат на физичкиот и психолошкиот развој, што резултира со сериозни проблеми во зрелоста.
Кои се најголемите грешки во воспитувањето на детето, а повеќето родители ги прават несвесно?
Една од нив, според експертите, е претераната заштита на детето од сите потенцијални опасности и проблеми кои му се закануваат. Имено, иако е сосема разбирливо родителите да се трудат да го заштитат своето дете од негативни надворешни влијанија, прекумерната заштита само повеќе прави штета отколку корист.
Од време на време, детето мора да „презема“ ризици и да се соочи со лоши работи за да научи да се справува со проблемите подоцна во животот, но и да стекне одредена доза на самодоверба и сигурност што му е потребна за еден ден да стане одговорна личност.
Исто така, грешката што ја прават повеќето родители е да го учат своето дете дека секогаш мора да биде совршен. Имено, не е реално да се очекува од било кого, а најмалку од дете, да не греши и секогаш да носи правилни, или добри одлуки. Секој од нас понекогаш греши, но токму грешките ни помагаат да научиме нешто и следниот пат да постапиме попаметно. Истото е и со децата, објаснуваат психолозите.
Друга грешка што ја прават многу родители е занемарување или потценување на желбите и интересите на детето. Понекогаш на родителите може да им се чини дека нешто што детето го сака е нереално, па дури и невозможно. Меѓутоа, психолозите нагласуваат дека секогаш треба да го поддржуваме детето во неговите амбиции, без разлика колку тоа ни звучи смешно или неверојатно. Детето ќе добие самодоверба ако види дека и неговите родители веруваат во него и неговите способности.
