Зимата со себе носи многу радости, но за родителите често значи и сезона на навидум бескрајни настинки и кашлица кај децата. Многумина тогаш се прашуваат дали станува збор за безопасна вироза што ќе помине сама од себе или сепак е време за посета на лекар. Матичниот лекар д-р Доминик Гринјер објаснува на кои знаци треба да се внимава за родителите да знаат кога да побараат стручна помош.
„Кашлицата и настинките се многу чести, особено во овој период од годината. Во повеќето случаи тие се нормален дел од детството и нема причина за загриженост. Децата во просек имаат околу осум вирусни инфекции годишно“, вели д-р Гринјер.
„Сепак, сосема е разбирливо родителите да се грижат, а кога кашлицата трае подолго или често се враќа, тешко е да се процени кога е вистинскиот момент за лекар.“
Според насоките на Националната здравствена служба, ако детето нормално јаде, пие и дише и нема потешкотии со дишењето или свирење во градите, кашлицата обично не е причина за загриженост. Таа всушност е природен механизам со кој телото ја чисти слузта од грлото и белите дробови.
Симптоми кои бараат внимание
Сепак, постојат ситуации во кои треба да се реагира. Лекарска помош треба веднаш да се побара ако детето има потешкотии со дишењето. Посета на лекар се препорачува и ако кашлицата трае подолго од три недели, се влошува ноќе или е придружена со свирење и недостиг на воздух, бидејќи тоа може да укажува на посериозен проблем.
„Во повеќето случаи кашлицата се повлекува со одмор и доволен внес на течности во рок од неколку недели. Она што сакаме да го видиме е дете кое целосно се опоравува и има периоди без никакви симптоми помеѓу болестите“, објаснува д-р Гринјер.
„Но, ако детето има долготрајна кашлица или свирење во градите, тешко добива на тежина или често има потреба од антибиотици поради инфекции на градниот кош, можеби е време за преглед кај специјалист за да се открие причината. Симптомите кои се сериозни, долготрајни или невообичаени за вашето дете никогаш не треба да се игнорираат.“
Што може да предизвика долготрајна кашлица
Меѓу можните причини за долготрајна кашлица се астмата, која ги зафаќа дишните патишта, но и ослабениот имунолошки систем. Поретко, причината може да бидат и структурни проблеми со белите дробови или хронични белодробни заболувања, како што е цистичната фиброза.
На крај, д-р Гринјер особено нагласува: „Ако детето има какви било потешкотии со дишењето, веднаш побарајте лекарска помош. Исто така, ако кашлицата не престанува и е придружена со висока температура, важно е што побрзо да се јавите кај матичниот лекар, бидејќи тоа може да укажува на посериозна инфекција.“
