Повеќето родители го познаваат оној чувствo кога „нешто едноставно не е во ред“. Детето можеби нема јасни симптоми или тие не изгледаат драматично, но внатрешниот аларм се вклучува. И додека многумина тогаш се прашуваат дали претеруваат, ново истражување покажува дека родителската загриженост многу често има цврста основа.
Студија објавена во списанието JAMA Network Open покажала дека родителите биле во право во дури 9 од 10 случаи кога се посомневале дека нивното дете е сериозно болно или повредено.
Што покажа истражувањето?
Истражувачите следеле 2.400 деца и тинејџери кои биле примени во итната служба на Универзитетската болница во Оулу, Финска. Родителите за време на обработката пополнувале прашалник со 36 прашања, а целта била да се провери дали дигитален прашалник може да им помогне на семејствата дома да проценат дали навистина е потребно да се оди во итна помош.
Прашалникот на крајот не се покажал доволно прецизен за да го замени лекарскиот преглед. Но, истражувачите откриле нешто друго – и многу важно.
Родителската самопроценка на загриженоста се покажала како еден од најсилните показатели за сериозна болест, дури посилен од одделни конкретни симптоми.
Родителите кои во прашалникот се изјасниле како умерено до изразено загрижени биле оправдано загрижени во 91 % од случаите – нивните деца навистина имале потреба од итно болничко лекување. Тоа вклучувало терапија со интравенски антибиотици, поддршка со кислород, прием во единица за интензивна нега, па дури и оперативни зафати.
„Родителската загриженост е важен предупредувачки знак“, изјавила водителката на истражувањето, д-р Хила Поури, педијатар од Универзитетот во Оулу. „Ако родителот е загрижен поради ненадејна болест кај своето дете, детето мора да има можност да биде прегледано од лекар. Загрижен родител не треба да остане сам во проценката на состојбата од далечина.“
Кога веднаш да повикате итна помош?
Според препораките на Американската академија за педијатрија, итна помош треба веднаш да се повика ако детето:
- не може да дише
- се гуши и не можете да го отстраните странското тело
- има напад (конвулзии)
- има сериозна алергиска реакција
- има тешка изгореница или било во затворен простор зафатен од пожар
- има тешка повреда (на пр. скршеница, нагмечување на екстремитет, длабока рана)
- проголтало отровна супстанца
- обилно крвари и крварењето не може да се запре
- е пронајдено без свест по престој под вода
- изгуби свест
- било сведок на тешко кривично дело или е негова жртва
Во согласност со резултатите од ова истражување, експертите порачуваат и следново: ако не сте сигурни што се случува, но имате чувство дека детето е во опасност – подобро е да реагирате отколку да чекате.
Родителскиот инстинкт не е непријател на разумот. Напротив, тој често е резултат на длабоко познавање на сопственото дете – неговото однесување, изразот на лицето, енергијата и неговата „вообичаена“ состојба.
Лекарите се тука за да проценат и да ја потврдат дијагнозата, но родителите најчесто се првите што забележуваат дека нешто отстапува од нормалното. А како што покажува ова истражување – тој внатрешен глас многу често не греши.
