На родителите генерално им е непријатно да зборуваат со децата за сексуалните односи, па ја избегнуваат темата, но отворениот разговор е најдобриот начин за спречување на несакана бременост и полово преносливи болести, покажало најново истражување.
Некои родители воопшто не разговараат за тоа со децата, други разговараат во “завиена“ форма, но отворениот раговор, колку и да е непријатен, води до безбедна сексуална пракса и нема да ги наведе тинејџерите порано да стапат во сексуални односи, како што мислат.
Тим на истражувачи во 31 студија анализирале над 12.400 млади лица, на возраст од девет до 18 години, а просечната возраст била 12 години.
Едно од највпечатливите сознанија на студијата било дека адолесцентите со кои родителите отворено разговарале на оваа тема, биле посклони на користење презервативи, отколку децата со кои родителите не разговарале. Исто така, научниците тврдат дека разговорот на оваа тема најголем ефект има кај децата кои имаат 14 или помалку години.
Водачот на студијата, д-р Лора Видман вели дека овој разговор помеѓу родителите и децата не влијаел на тоа на колку години младите станале сексуално активни.
“Со други зборови, децата со кои родителите разговарале за тоа, не станале сексуално активни ништо порано од оние со кои родителите не разговарале. Но, од друга страна, биле многу посклони да користат заштита кога станале сексуално активни“, потенцира д-р Видман.
