Во американската сојузна држава Њујорк е регистриран случај на детска парализа (полио) кај невакцинирана возрасна личност. Станува збор за прв случај на болеста во САД од 2013 година.
Инфекцијата резултирала со парализа на заболениот маж.
Полио, или полиомиелитис, е онеспособувачка и опасна по живот болест предизвикана од полиовирус. Вирусот се шири од човек на човек и може да го зарази ‘рбетниот мозок на една личност, предизвикувајќи парализа. Живее во грлото и цревата на заразено лице. Полиовирусот ги инфицира само луѓето. Влегува во телото преку устата и се шири преку: контакт со измет (фецес) на заразено лице или капки од кивање или кашлање на заразено лице (поретко). Повеќето луѓе кои ќе се инфицираат со полиовирус (околу 72 од 100) нема да имаат никакви видливи симптоми. Околу 1 од 4 лица (или 25 од 100) со полиовирусна инфекција ќе имаат симптоми слични на грип кои може да вклучуваат: воспалено грло, треска, замор, гадење, главоболка, болки во стомакот, според CDC.
Експертите веќе предупредија на можноста за враќање на болестите кои се сметаа за искоренети во САД бидејќи се зајакнува влијанието на движењата против вакцинација.
Стапката на вакцинација против детска парализа во САД е повисока од 93%, но во округот каде што е забележан последниот случај на болеста, таа е значително помала.
