Секој родител сака неговото дете да порасне во одговорна личност која нема да бега од своите обврски. Со оглед на тоа дека воспитувањето дете не е лесна задача, многу родители не знаат како да го поттикнат развојот на одговорност кај своите деца. Сепак, одредени грешки не треба да се прават бидејќи тие имаат негативно влијание и прават повеќе штета отколку корист.
Како што објаснува детскиот психолог Лаура Маркам, постојат неколку работи што родителите треба да ги избегнуваат доколку сакаат да воспитаат одговорно дете.
Една од најголемите грешки што ја прават родителите, а го саботира развојот на одговорност кај нивното дете е преземањето одговорност за секоја грешка на детето. Како што објаснува психологот, родителите треба да му дадат до знаење на детето дека тоа е одговорно за своите грешки и на тој начин да го научат самостојно да се соочува со проблемите.
Исто така, родителите никогаш не треба да му попуштат на своето дете кога станува збор за извршување на домашните работи. Иако е сосема разбирливо дека нема да бараме мало дете да го исчисти целиот стан, чистењето на играчките или поставувањето на масата ќе биде одлично за развивање одговорност.
Уште една грешка што родителите често ја прават несвесно е поврзана со недоволното почитување на рутината. Воспоставувањето одредени рутини е многу важно за секое дете и тие се клучни во неговиот живот поради многу причини. Како што објаснува психологот Маркам, децата совладуваат одредени рутини уште од најрана возраст.
Пред сè, тоа е рутината на спиење, расчистување на играчките и подготвување за во градинка наутро. Потоа развиваат успешни навики за учење и хигиена, а подоцна и основни животни вештини преку повторување на рутините во домаќинството, како перење алишта или подготовка на оброци, а сето тоа придонесува за развој на одговорност кај детето.
