Ако се чувствувате малаксано, немојте веднаш да претпоставувате дека се работи за обична настинка и да ризикувате да ги изложите другите на инфекцијата
Со оглед на фактот дека има многу луѓе кои без да знаат го поминуваат Ковид-19, односно не развиваат никакви симптоми на болеста, но можат да ја шират, постојат начини да откриете дали сте биле изложени на вирусот.
- Сте биле во кафулиња
Угостителските објекти се означени како места со висок ризик, бидејќи собираат голем број луѓе, кои зборуваат гласно, не носат маски, а вентилацијата не е најдобра во сите случаи.
- Сте имале домашен собир
Дури и ако постојано носите маска кога сте надвор, можно е да сте биле изложени на коронавирусот во сопствениот дом. Имено, докажано е дека семејните собири се местата каде најмногу се шири коронавирусот, па ако сте биле на собир со повеќе од 10 лица во вашиот или во некој друг дом, голема е веројатноста дека сте биле во контакт со вирусот, предупредува водечкиот американски експерт за заразни болести, Ентони Фаучи, а пренесува порталот „Eat This, Not That“.
- Сте имале гостин од друг град или држава
Ако покрај семејните собири, сте имале гости кои не се од вашето место или држава, многу веројатно е дека сте биле изложени на вирусот, особено ако вашите гости патувале со јавен превоз.
- Сте биле во близок контакт со некој што добил позитивен наод
CDC апелира сите кои во изминатите три месеци немале позитивен тест на Ковид-19 да се изолираат доколку биле во близок контакт со некој што подоцна добил позитивен тест. Близок контакт подразбира престој од повеќе од 15 минути на растојание од помалку од два метра од некого, грижа за лице заболено со Ковид-19, директен физички контакт како бакнеж или прегратка, споделување храна и пијалок или да сте биле во нивна близина додека кашлаат.
- Ако имате какви било симптоми
Ако почнете да се чувствувате болно, дури и ако станува збор за затнат нос или лесна кашлица, тоа може да биде Ковид-19. Иако најчестите симптоми се треска, отежнато дишење, сува кашлица и губење на сетилото за вкус и мирис, постојат и низа други различни симптоми на вирусот. Ако се чувствувате малаксано, немојте веднаш да претпоставувате дека се работи за обична настинка и да ризикувате да ги изложите другите на инфекцијата. Тестирајте се веднаш и самоизолирајте се за да го спречите ширењето на вирусот.
Во секој случај, ако се посомневате дека сте биле изложени на вирусот, веднаш контактирајте го вашиот лекар кој ќе ви каже што да правите понатаму.
