Откако започна пандемијата на Ковид-19, здравствените експерти предупредуваат дека главниот проблем во контролирањето на вирусот е неговата способност да мутира во позаразни и поопасни варијанти.
Најновата подваријанта на омикрон BA.2.75.2 сега предизвикува тревога. Таа веќе успеа да го избегне имунолошкиот одговор создаден од вакцината и не може да се неутрализира со моментално достапните лекови. Досега е регистрирана во 47 земји во светот.
Што е досега познато за варијантата BA.2.75.2?
Како што сугерира и самото име, BA.2.75.2 е создадена од подваријантата BA.2.75. Брзо се шири, особено во Индија, а со оглед на тоа дека има многу сличности со постоечката подваријанта, Светската здравствена организација не ја нарече нова варијанта, туку подваријанта омикрон, која во моментов е под надзор. Тоа значи дека здравствените работници треба да дадат приоритет на следењето на случаите на инфекција со оваа подваријанта, за да се спречи ширење на инфекцијата.
Зошто BA.2.75.2 ги загрижува здравствените работници?
BA.2.75.2 собра три дополнителни мутации од BA.2.75, од кои две се местото каде што вирусот се врзува за човечките клетки за да ги инфицира. Според студијата на шведските истражувачи објавена на 16 септември, овие отстапувања и помагаат на новата варијанта да ги избегне сите моментално достапни и одобрени лекови, освен еден – бебтеловимаб. Овој лек се дава преку инфузија на луѓе кои имаат благи до умерени симптоми на Ковид-19, кои имаат голем ризик да развијат потешка болест. Но, бидејќи лекот таргетира само специфичен дел од шилестиот протеин на вирусот, нема гаранција дека вирусот нема да развие мутации за да го избегне.
Во трудот објавен на 7 септември во „New England Journal of Medicine“, јапонските научници објавија охрабрувачки наоди при нивното тестирање на варијантата BA.2.75 на достапните третмани. Тие исто така открија дека бебтеловимаб може да ја неутрализира варијантата, а исто така објавија и дека некои од првите развиени антивирусни третмани, ремдесивир и молнупиравир, како и најновиот, паксловид, исто така продолжуваат да бидат ефикасни.
Но отпорноста е карактеристика на варијантата BA.2.75.2, што ги загрижува здравствените власти. Шведските научници, исто така, објавија дека нивоата на антитела кои се борат против вирусот кај крводарителите, од кои некои биле вакцинирани или неодамна инфицирани со САРС-КоВ-2, биле пет пати пониски во однос на варијантата BA.2.75.2 отколку против моментално доминантната варијанта омикрон – BA.5. Тие исто така открија дека варијантата BA.2.75.2 е отпорна на антивирусната комбинирана терапија Evusheld. Научниците заклучија дека оваа варијанта „ефикасно го избегнува актуелниот имунитет кај населението“ и „ја претставува најотпорната варијанта карактеризирана до сега“.
Колку добро функционираат вакцините против варијантата BA.2.75.2?
Сликата во моментов е нецелосна. Студиите на луѓе за најновата засилена вакцина против Ковид, која цели на две други подваријанти на омикрон, BA.4 и BA.5, сè уште не се завршени и не е јасно колку ќе биде ефикасна против варијантата BA.2.75.2.
Дејвид Монтефиори, вирусен имунолог во Медицинскиот центар на Универзитетот Дјук, кој го надгледува тестирањето на вакцината на Модерна против нови варијанти, сега проучува како примероците од крв од луѓето имунизирани со вакцината на Модерна се справуваат со варијантата BA.2.75.2. Во претходните студии на варијантата BA.2.75, резултатите беа охрабрувачки.
Во писмото објавено на 9 септември во „New England Journal of Medicine“, Монтефиори и неговиот тим објавија дека нивоата на антитела против варијантата BA.2.75 биле повеќе од четири пати пониски од нивоата на антитела против оригиналниот вирус кај луѓето вакцинирани со вакцината Модерна, но дека и понатаму се ефикасни.
Сепак, трите дополнителни мутации на варијантата BA.2.75.2 „може потенцијално да го направат вирусот помалку осетлив на неутрализација“, вели тој, „но мораме да го тестираме и да дознаеме“. Резултатите од тие тековни студии, финансирани од Модерна и Националниот институт за здравство, се очекуваат во октомври.
