Во постудениот период од годината, кашлицата е честа појава кај децата. Тоа е придружен симптом на инфекции на дишните патишта, како и познати детски болести како што се мали сипаници или голема кашлица (пертусис).
Причините за кашлица можат да бидат различни, од недостаток на влага во воздухот, чад или некое загадување, кои може да ги иритираат дишните патишта, до бактерии и вируси кои го напаѓаат респираторниот систем.
Затоа, кашлицата не секогаш значи болест, таа е само еден од одбрамбените механизми што ги ослободува дишните органи од сите непожелни материи (прашина, чад, вируси, бактерии, слуз).
Зимскиот период е време за настинки и ширење на респираторни инфекции, бидејќи се повеќе луѓе поминуваат време во затворени простории, а членовите на домаќинството лесно можат да ја пренесат заразата на бебето. Иако кашлицата не бара посебно лекување, важно е да се елиминира причината што ја предизвикала.
Се разликува продуктивна (влажна, “зрела“) од непродуктивна (сува, надразнувачка) кашлица. Кашлицата е редовен симптом кај децата со акутно воспаление на дишните патишта. Започнува како непродуктивна, а се појавува поради воспалителна надразба на слузницата. По неколку дена се јавува продуктивна кашлица поради зголемено лачење на слуз. Детето до петтата година од животот го голта искашланиот секрет, а дури подоцна учи да ги исплука искашланите секрети.
Секретот може да биде слузаво-гноен кај бактерискте воспаленија на бронхиите или белите дробови, или бел, густ, жилав во случај на астматичен напад. Меѓутоа, детето може продуктивно да кашла и да искашла секрети од горните дишни патишта. Ова најчесто се случува при воспаленија во подрачјето на слузницата на носот, синусите, фаринксот или третиот крајник.
Иако кашлицата е неспецифичен симптом и се јавува кај сите болести на респираторниот систем, некои нејзини карактеристики можат да помогнат во пронаоѓањето на вистинската причина.
Сува, не особено силна кашлица
Често се јавува кај доенчиња со акутно воспаление на ждрелото и понекогаш може да предизвика повраќање со слуз или храна. Кај децата од предучилишна и училишна возраст, овој тип на кашлица најчесто се појавува во раните утрински часови, а е предизвикан од слевање на секрет во ждрелото од носот, синусите или поради воспаление на “третиот крајник“. Знак за астма може да биде и долготрајната надразнувачка кашлица, која се појавува рано наутро.
Сува, спазматична кашлица
Се карактеризира со серија последователни кашлања проследени со силно, звучно вдишување, типично за голема кашлица. Овој вид на кашлица може да биде придружена со црвенило на лицето и повраќање, особено кај доенчиња и мали деца.
Кашлицата при напади со или без повраќање може да се појави и кај некои болести на респираторниот систем предизвикани од вируси и кај цистична фиброза.
Гласна, засипната (рапава) кашлица
Овој тип на кашлица, која звучи како “кучешко лаење“, најчесто се јавува кај ларингитис.
Продуктивна кашлица
Продуктивната кашлица ја карактеризира количината на слуз во дишните патишта на детето и содржината што може да се искашла. Овој тип на кашлица е карактеристичен за бронхитис, астма, цистична фиброза.
Колку долго трае кашлицата?
Кашлицата може да биде акутна, хронична и тврдокорна, долготрајна и повторувачка. Може да се појави дење или ноќе, преку целата година или само сезонски.
Повторувачката кашлица се јавува со чести воспаленија на горните дишни патишта, поради слевање на секрет од носот или синусите, обично кај деца кои посетуваат колектив.
Кашлицата која се јавува сезонски (пролет, рано лето, есен) најчесто е последица на алергиска преосетливост на полен од дрвја, трева и коров. Потоа, покрај кашлицата, се појавуваат и други симптоми на алергија на полен: црвенило, чешање и солзење на очите, кивање и чешање на носот, а кај поленска астма и отежнато дишење.
Кашлицата кај астмата може да биде сува или продуктивна, да се јавува во текот на денот или ноќта или само при физички напор. Понекогаш астмата може да се манифестира само како упорна, долготрајна кашлица.
Долготрајната кашлица се јавува и кај оштетување на бронхијалната слузница која е предизвикана од воспалително дејство на бактерии, вируси, габи, вдишување на штетни гасови, кај цистична фиброза… Долготрајната кашлица е и голема кашлица и кашлица која се задржува поради пречувствителност на рецепторот по некоја, најчесто вирусна, инфекција.
