Сосема е разбирливо дека во секој партнерски однос повремено доаѓа несогласувања и недоразбирања, а повишениот тон често е неизбежен во тој случај. Но, психолозите предупредуваат дека родителите треба да избегнуваат расправии пред децата, без разлика колку тоа изгледа невозможно. Тие тврдат дека викањето, навредите и сите останати работи кои често излегуваат при расправии може негативно да се одразат на детето.
Кога родителите се расправаат меѓу себе пред своите деца, некои деца можат да станат избезумени, загрижени, вознемирени и депресивни. Други можат да го усвојат овој модел на однесување, па често можат да бидат агресивни и да развијат одредени проблеми со однесувањето дома или на училиште. Имено, децата често ги копираат своите родители, а доколку постојано се расправаат, децата ќе почнат да се однесуваат на идентичен начин кога и самите ќе наидат на несогласувања со други луѓе.
Децата може да развијат нарушувања на спиењето и здравствени проблеми како што се главоболки и стомачни болки или можат често да се разболуваат. Нивниот стрес може да влијае на нивната способност да обрнат внимание, создавајќи потенцијални проблеми во учењето.
Повеќето деца израснати во средини на деструктивни конфликти имаат проблем да воспостават здрави, избалансирани односи со своите врсници. Дури и односите меѓу браќата и сестрите се негативно погодени, предупредуваат психолозите.
