Не е невообичаено ако повремено детето сака да остане дома. Но, ако тоа се случува често, се претвора во проблем, дури и ако причината што ја наведува детето се менува. Ова се неколку начини на кои можете да одговорите кога детето ќе ви каже дека не сака да оди на училиште.
НЕ МИ СЕ ОДИ
Доколку детето рече: “Не ми се оди“, можно е да помислите дека не знае која е вредноста на образованието, и ќе му одговорите нешто во смисла “Не ме интересира сакаш да одиш или не, твоја работа е да одиш на училиште“, а вистинската фрустрација која стои зад зборовите на вашето дете е дека тоа веројатно има некој проблем во училиште. Имено, децата кои имаат пореметување на вниманието и потешкотии со учењето обично не реагираат без причина. Тоа можеби е нов проблем или нешто што веќе подолго го мачи. Кажете му: “Не ти се оди на училиште оти нешто не оди како што би сакал? Ќе позборуваме за тоа што те мачи кога ќе се вратиш од училиште и ќе смислиме што може да направиме да ти оди подобро“.
УМОРЕН СУМ
Ако детето рече дека е преуморно за училиште, можеби ќе помислите – доволно спие, не може да биде уморно. Само сака да остане дома и да игра цел ден. Можеби сте во искушение да му речете: “Спиеше 10 часа, не е можно да си уморен за на училиште“. Но, факт е дека училиштето може да биде многу исцрпувачко за децата со пореметување на виманието и учењето. Тие мораат да вложуваат многу енергија за да бидат во чекор со останатите деца. Исто така, може да им биде напорно и постојаното обидување да ги задоволат очекувањата на возрасните. Кажете му на детето: “Разбирам дека си уморно, може да ги откажеме сите активности надвор од училиштето, малку да се одмориш“. И набљудувајте го детето следните неколку дена за да видите дали се чувствува поинаку. Ако е така, размислете за промена на распоредот на неговите дневни активности за да има повеќе слободно време.
ГО МРАЗАМ УЧИЛИШТЕТО
Ви каже ли детето дека го мрази училиштето, веројатно веднаш ќе помислите дека претерува. Можеби ќе бидете во искушение да му речете: “И јас мразам многу работи кои морам да ги направам. Таков е животот“. Работата е во тоа да понекогаш некое лошо искуство или одреден проблем во училиште како црн облак може да се надвие над детето. Речете му на детето дека сте свесни дека има некој проблем на училиште, бидејќи знаете дека тоа многу сака да оди. Прашајте го што се случува. Поттикнете го да биде поконкретно во одговорот, па во договор со наставникот или професорот најдете помош за детето.
