Веројатно веќе знаете дека во повеќето случаи антибиотиците не се користат за лекување на вируси, но добрата вест е дека постои начин да му помогнете на вашето дете кога ќе „фати“ некој вирус.
Две педијатриски медицински сестри кои, меѓу другото се и мајки, споделуваат што значи методот CHARM кој помага кога детето има вирус, а еве што е во прашање.
- Гушкање
Многу гушкање и галење, ладна облога за топло чело и топла купка за опуштање на мускулите може да направи голема разлика.
- Хидратација
Особено е важно да се води сметка за внесот на течности кога детето е болно. Изберете вода или напивки за орална рехидратација, а ако детето одбие, пробајте разреден сок од јаболко. Можете да му дадете и обично млеко. Не му давајте пијалаци богати со шеќер бидејќи тие може да ја влошат дехидрацијата. Внимавајте на знаците на дехидрација.
- Ублажување на болките
Ако детето има болки, се чувствува слабо, дајте му лекови за ублажување на болка. Секогаш фокусирајте се повеќе на тоа како се чувствува детето отколку на она што го кажуваат бројките на термометарот.
- Одмор
Најдобар начин да му помогнете на вашето дете да закрепне е да го оставите да се одмори, за да може неговиот имун систем да се бори против болеста. Не грижете се ако детето спие повеќе од вообичаено или јаде помалку неколку дена. Ако ова продолжи подолг временски период, побарајте лекарска помош.
- Следење
Кога детето има вирус, следете ги неговите симптоми. Ако состојбата се влоши или не се подобри, ако сте загрижени од која било причина, однесете го на лекар. Ако забележите какви било знаци на загриженост, побарајте итна медицинска помош, велат медицинските сестри и наведуваат кои можат да бидат тие знаци за загриженост:
- Невообичаено или отежнато дишење
- Проблеми со хранењето (особено кај бебињата)
- Помалку често мокрење или помалку влажни пелени од вообичаено
- Детето не е целосно будно, не може да се разбуди или е неутешно
- Осип придружен со температура или осип што не исчезнува
- Бебиња помали од три месеци со температура повисока од 38 степени
- Невообичаена боја на кожата на детето
- Инстинктот ви кажува дека нешто не е во ред.
На крајот, овие две педијатриски медицински сестри потенцираат: „Запомнете, вие најдобро го познавате вашето дете“.
