Индуцираното породување е процедура во која се предизвикуваат контракции на матката и породување. Генерално се прави откако ќе се констатира дека има индикации за почеток на породувањето, но нема знаци дека тоа ќе настане спонтано. Индуцираното породување се врши кога методите за природно поттикнување на породувањето не биле успешни. Овој тип на породување треба да се практикува само кога е апсолутно неопходно.
Вашиот лекар може да препорача индуцирано породување поради повеќе причини, особено кога бременоста почнува да го загрозува вашето здравје или здравјето на вашето бебе:
- породувањето доцни две или повеќе недели,
- водењакот пукнал, но не чувствувате трудови,
- страдате од инфекција на матката,
- вашето бебе престанало да расте во неочекуван момент,
- има премалку амнионска течност,
- плацентата почнала да се одвојува,
- страдате од висок крвен притисок или дијабетес тип 2.
Породувањето по правило може да доцни до две недели. Колку подолго се одложува породувањето, толку вашето бебе ќе биде поголемо, што може да го отежне вагиналното породување. Стареењето на плацентата може да го загрози развојот на бебето и да предизвика инфекции на респираторниот систем и проблеми со дишењето.
Доколку сте заинтересирани за индуцирано породување, прво мора да разговарате со вашиот гинеколог. Индуцираното раѓање го зголемува ризикот од некои компликации:
- Поттикнувањето на породувањето може да го зголеми ризикот од царски рез. Ризикот е уште поголем ако се работи за прво раѓање.
- Индуцираното породување го зголемува ризикот од предвремено раѓање на детето, што го зголемува ризикот од болести на респираторниот систем.
- Лековите кои се користат за поттикнување на породувањето (окситоцин или простагландин) може да предизвикаат голем број на контракции и да го забават срцевиот ритам на мајката и бебето.
- Некои методи на индуцирано породување, како што е намерното пукање на водењакот, може да го зголемат ризикот од појава на инфекција кај мајката и бебето.
- Индуцирањето на породувањето може да го зголеми ризикот од заплеткување на папочната врвца, што го намалува или целосно го прекинува снабдувањето со кислород на бебето.
- Многу се ретки, но има случаи на руптура на матката при индуцирано породување. Во такви случаи, вагиналното раѓање се прекинува и се продолжува со царски рез.
- Индуцираното породување може да предизвика слабеење на карличните мускули, што го зголемува ризикот од крвавење по породувањето.
