Дали некогаш сте се запрашале што прави бебето во стомакот, дали му се допаѓа храната што ја јадете, дали му пречи гласната музика или ужива кога му пеете и го допирате стомакот? Научниците откриле што сè може да прави фетусот за време на бременоста, а некои од овие сознанија навистина изненадуваат.
Ика
Икањето кај фетусот е сосема нормална појава што ја чувствуваат многу трудници. Бебињата почнуваат да икаат уште кон крајот на првиот или почетокот на вториот триместар. Некои жени го чувствуваат како серија ритмични движења, а други само повремено.
Препознава песни
Истражување на Универзитетот во Хелсинки покажало дека бебињата можат да препознаваат звуци уште во матката. Во текот на третиот триместар, на трудници им пуштале иста детска песна, а по раѓањето било забележано поголемо мозочно активирање кај бебињата кои ја слушале песната за време на бременоста.
Вежба изрази на лицето
Британски научници, анализирајќи 4Д ултразвучни снимки, откриле дека бебињата до 24. недела можат да се насмевнуваат. До 36. недела, тие покажуваат и други изрази на лицето – спуштање на веѓите, збрчкан нос или истегнати усни.
Ги чувствува вкусовите на храната
Хранливите материи од храната преку амнионската течност стигнуваат до фетусот, кој околу 20. недела почнува да чувствува вкусови, па дури и мириси, како чад од цигари.
Истражувањата покажуваат дека бебињата чии мајки јаделе моркови за време на бременоста подоцна покажуваат поголема наклонетост кон тој вкус.
Реагира на стрес
Едно британско истражување покажало дека кога трудницата се чувствува вознемирено, фетусот почесто го допира лицето со левата рака. Овие движења укажуваат дека емоционалната состојба на мајката влијае врз однесувањето на бебето во стомакот.
Може да „плаче“
Истражување открило дека изложување на нискофреквентни звуци кон стомакот на трудницата во третиот триместар кај фетусот предизвикува реакции слични на плачење. Бебето отвора уста, дише неправилно, а научниците забележале и треперење на усните.
